«Նորաշեն 2007» սպառողական կոոպերատիվի նախագահ Արմեն Թադևոսյանի և Լուսաբեկ Սամվելյանի կողմից մի շարք քաղաքացիներին պատկանող առանձնապես խոշոր չափի գույքը խարդախությամբ հափշտակելու վերաբերյալ Հայաստանի հատուկ քննչական ծառայությունում քննվող քրեական գործի շրջանակներում հինգշաբթի օրը ձերբակալվել է Երևանի բնակիչ Ցոլակ Պետրոսյանը:
Պետրոսյանը կասկածվում է Քրեական օրենսգրքի 38-178-րդ հոդվածի 3-րդ մասի 1-ին կետով նախատեսված հանցագործություն կատարելու մեջ՝ «հանցակցություն խարդախությանը, որը կատարվել է առանձնապես խոշոր չափերով», ինչի համար սահմանված է 4-8 տարվա ազատազրկում՝ գույքի բռնագրավմամբ կամ առանց դրա:
«Նորաշեն 2007» կոոպերատիվը սկսել էր Երևանի Աջափնյակ համայնքի Գևորգ Չաուշ 14/3 շենքի շինարարությունը, իսկ որոշ ժամանակ անց պարզվել էր, որ այս շենքում նույն բնակարանը միևնույն ժամանակ մի քանի մարդկանց է վաճառվել կամ խոստացվել: Կոոպերատիվի այն անդամները, որոնցից շատերը վաճառել են նախկին բնակարանները կամ փոխանակել նորը ձեռք բերելու հույսով, այժմ անտուն են:
«Նորաշեն 2007»-ի նախագահ Արմեն Թադևոսյանը կալանավորվել է ավելի վաղ, մեկ ամիս առաջ էլ այս գործով ձերբակալվել է «Էսկո» կոնցեռնի հիմնադիր նախագահ Սարգիս Աղաբեկյանը: