Վերջին շրջանում շախմատի Հայաստանի հավաքականի մասին այնքան չեն խոսում, որքան իշխանություն-ընդդիմություն պարտիայի մասին։ Հիմա ընթանում է երկրորդ պարտիան, առաջինն ավարտվել է։ Լրագրողների հետ հանդիպմանն ասաց «Ազգային համաձայնություն» կուսակցության նախագահ Արամ Հարությունյանը՝ ՀԱԿ-ընդդիմություն երկխոսությունը մեկնաբանելով շախմատային պարտիայի տեսանկյունից։
«Ցավոք, այդ երկխոսությունն ուշացած է այն իմաստով, որ երկու կողմերն էլ անկեղծ չեն։ Դա պետք է լիներ մարտի 1-ից առաջ, քարոզարշավից առաջ»,- ասաց Ա.Հարությունյանը՝ նշելով, որ կողմերն այն ժամանակ անտեսել էին երկխոսության գնալու կոչերը։
Նրա կարծիքով՝ իշխանությունն այս հանդիպմանը, ի դեմս Դավիթ Հարությունյանի, շատ ավելի լավ էր պատրաստված, քան ՀԱԿ-ը, բացի այդ, իշխանությունը շատ ավելի լավ մարտավարություն է ընտրել՝ քնննարկումները չի մերժում։
Նրա կանխատեսմամբ՝ ՀԱԿ-ը աշնանը՝ սեպտեմբերի 21-ից հետո կսրի իրավիճակը, չեն լինի ոչ մի արտահերթ ընտրություններ և երկխոսողները ինչ-որ պահի կբաժանվեն։
«Կառաջանա երրորդ ուժ, որն իր հույսը չի կապի ո՛չ ընդդիմության, ո՛չ էլ իշխանության հետ։ Եվ այդ էլեկտորատն իր տերը կունենա»,- նշեց վերջինս՝ հավելելով, որ իր կուսակցությունը կլինի այդ երրորդ ուժի մեջ, իսկ թե ով կղեկավարի այդ՝ ուժը պարզ կդառնա հետագայում։
Ա.Հարությունյանը կարծում է, որ քննարկումները կշարունակվեն մինչև սեպտեմբեր, ՀԱԿ-ը դա կներկայացնի որպես իր հաղթանակ, քննարկումներ ու ասուլիսներ կլինեն, կխոսեն, որ իրենք շատ սկզբունքային են։ «Սերժ Սարգսյանը առաջին պարտիան հաղթեց՝ երկու քայլով մատ անելով։ Դիրքը ՀԱԿ-ի համար այնպիսին է, որ պարտվել է առաջին խաղում»,- ասաց «Ազգային համաձայնություն»կուսակցության նախագահը՝ ավելացնոլով, որ կողմերի միջև առկա է համաձայնություն և երկխոսությունը տեղի կունենա Լևոն Տեր-Պետրոսյանին ԱԺ-ում կամ կառավարությունում տեղ տալու համար։
Անդրադառնալով վարչապետին՝ որպես շախմատային գլխավոր ֆիգուր, Ա.Հարությունյանն ասաց, որ Տ.Սարգսյանը կլինի այն զոհը, որ կտա Ս.Սարգսյանը։ «Ուրիշ ֆիգուր չկա, որ զոհաբերի։ Այս խաղում հիմնական ֆիգուրը վարչապետն է, ով վատ վարչապետ է։ Իր ռեսուրսն արդեն սպառված է»,- համոզված է Ա.Հարությունյանը։