Մայիսի 26-ին Մարդու իրավունքների եվրոպական դատարանը (ՄԻԵԴ) հրապարակել է ադրբեջանցի սպա Ռամիլ Սաֆարովի կողմից Հունգարիայում ՀՀ Զինված ուժերի սպա Գուրգեն Մարգարյանի սպանության և հետագայում ադրբեջանցի սպայի արտահանձնման ու պատժի կրումից ազատ արձակելու գործով վճիռը: ՄԻԵԴ-ն արձանագրել է, որ Ադրբեջանը խախտել է կյանքի իրավունքը և խտրականության արգելքը:
Այս և այլ թեմաների շուրջ «Առաջին լրատվական»-ի հետ քննարկմանը մասնակցեցին քաղաքագետ Արմեն Վարդանյանը, «Հայ կառուցողական կուսակցության» նախագահ Անդրիաս Ղուկասյանը, ԱԺ «Իմ քայլը» խմբակցության պատգամավոր Տիգրան Ուլիխանյանը:
Անդրիաս Ղուկասյանի խոսքով՝ ՄԻԵԴ-ի այսպիսի վճիռները պարզություն են մտցնում հայ-ադրբեջանական հարաբերությունների մեջ. «Կան կարծրատիպեր, որոնք արտացոլվել են ԵԽ ոչ հայանպաստ բանաձևերում: Այս վճիռը քաղաքական գործիք է, մեսիջ է՝ ուղղված միջազգային հանրությանը…»:
Արմեն Վարդանյանի գնահատմամբ՝ այս վճիռն աննախադեպ էր, որով ՄԻԵԴ-ը հաստատեց, որ Ադրբեջանում հայատյացությունը պետական մակարդակի է հասցվել. «Խաղաղ պայմաններում հայ սպային սպանելու համար հերոսի կոչում տալն աննախադեպ էր… Դիվանագիտական հարթակներում կարող ենք ՄԻԵԴ-ի վճիռն օգտագործել»:
Տիգան Ուրիխանյանը ՄԻԵԴ-ի վճիռը կարևորեց համամարդկային առումով. «Այս որոշումը ուղղված է ազգային խտրականության դեմ»:
Քննարկման մասնակիցներն անդրադարձան նաև ԱԺ քառօրյա նիստերի օրակարգին, ինչպես նաև դիտարկմանը, որ ԱԺ-ում բովանդակային քննարկումները համեմվեցին անարդյունավետ վեճերով, այդ թվում նաև դիմակ կրել-չկրելու հարցի շուրջ: Քննարկման մասնակիցների դիտարկմամբ՝ այն, ինչ պարտադրվում է, պետք է պարտադիր լինի բոլորի համար, արտոնյալներ չպետք է լինեն:
Քաղաքական կյանքը տեղեկատվական պատերազմի նոր փուլում է: Անդրադառնալով շրջանառվող կեղծ տեղեկություններին՝ թե՛ կորոնավիրուսի համավարակի, թե՛ ներքաղաքական զարգացումների վերաբերյալ, Արմեն Վարդանյանը նշեց, որ ամբողջ աշխարհում իռացիոնալ տարրերը աղետների շրջանում տարածում են կեղծ լուրեր՝ տարբեր նպատակներից ելնելով. «Նաև փորձ է արվում խուճապ առաջացնել և անվստահություն ձևավորել իշխանության նկատմամբ»:
Տիգրան Ուրիխանյանը կարծիք հայտնեց, որ կեղծ տեղեկատվության դեմ ամենաարդյունավետ պայքարի տարբերակը ամենօրա ռեժիմով օբյեկտիվ և ճշմարիտ տվյալները հանրությանը ներկայացնելն է, որպեսզի ինֆորմացիոն քաղց չառաջանա և այն չբավարարվի չհիմնավորված տեղեկատվությամբ:
«Մեր իշխանության միակ հենարանը շարքային քաղաքացու վստահությունն է. մենք որևէ կերպ չենք կարող խաբել հանրությանը, որովհետև այլ ռեսուրս չունենք»,- վստահեցրեց պատգամավորը:
«Իշխանության վրա տարբեր տեսակի «կրակոցներ» են լինում, բայց մենք արժանի չենք համարում նրանց ուղղությամբ «փամփուշտներ» օգտագործել»,- ընդգծեց Տիգրան Ուրիխանյանը՝ հավելելով, որ իշխանությունը շահագրգռված է արդյունավետ, առողջ ընդդիմություն ունենալ:
Մանրամասն՝ տեսանյութում: