Հայաստանի տնտեսությունն ապրիլ ամսին ունեցել է 17,2 տոկոս անկում։ Ի՞նչ հեռանկարներ կան, մայիս ամսվա համար ի՞նչ ենք սպասում․ «Առաջին լրատվական»-ի հարցին Menu.am-ի հիմնադիր Վահան Քերոբյանը պատասխանեց․ «Այն, որ տնտեսությունը 17,2 տոկոսով անկում է ապրել, շատ վատ է։ Մենք դեռևս մարտ ամսից ահազանգում էինք դրա մասին ու ասում, որ եթե չլինեն խիստ ագրեսիվ աջակցման ծրագրեր և զանգվածային ծրագրեր, ապա մեծ անկումն անխուսափելի կլինի։ Խնդրում եմ նկատի ունենաք, որ, քանի որ հունվար-փետրվարին մեր մոտ 8 տոկոս տնտեսական աճ էր գրանցվել, ապա, ըստ էության՝ տնտեսությունը մեկ քառորդով կրճատվել է։ Դա էլ իր հերթին հաջորդ ամիսներին ավելանալով կհանգեցնի գործազրկության աճին»։
Նա նաև հավելեց․ «Ես կարծում եմ, որ թեև տնտեսության որոշ ճյուղեր կակտիվանան, օրինակ՝ շինարարությունը, գյուղատնտեսությունը, սակայն կլինեն ճյուղեր, որտեղ կխորանա ճգնաժամը՝ հյուրընկալությունների ոլորտը, գրեթե ցանկացած արտադրության ոլորտը, որովհետև մի բան է, որ դա տևում է մեկ ամիս, մեկ այլ բան է, որ դա երկար է տևում, ու ընկերությունների և ընկերությունների հիմնադիրների մոտ ամրության պաշարները սպառվում են, և շուտով մենք կտեսնենք սնանկությունների շարք, եթե, իհարկե, մեր տնտեսական վարքագծում որևէ բան չփոխենք։
Ինչպես գիտեք՝ անցյալ տարի կապիտալ ծախսերը թերակատարվել են, և վարչապետը մի քանի անգամ նշել է, որ պետք է այս տարի որևէ կերպ չհանդուրժել կապիտալ ծախսերի թերակատարումը, բայց իմ հաշվարկներով՝ անցած 5 ամիսներին ընդամենը 25 միլիարդ դրամի կապիտալ ծախս է արվել՝ նախատեսված 280 միլիարդի փոխարեն։ Դա շատ-շատ մեծ թերակատարում է։ Արդեն այն, որ այս պահին մենք այդքան թերակատարել ենք, նշանակում է, որ կապիտալ ծախսերի վրա հույս դնել չի կարելի։ Կապիտալ ծախսերն ընթանում են ուշացումով, որը չի հանգեցնելու նրան, որպեսզի այդ ծախսված գումարները մի քանի անգամ պտտվեն տնտեսության մեջ։ Այդ առումով, իհարկե, շատ մեծ հետընթաց ունենք, որի ամենամեծ պատճառը, ես կարծում եմ՝ պետական գնումների ժամանակ պահանջվող բանկային երաշխիքներն են։ Բանկային երաշխիքների այն մեթոդը, որն այսօր օգտագործվում է պետական գնումների ժամանակ, համարում եմ վայրի, և այն չի համապատասխանում որևէ միջազգային ստանդարտի»։
