Ավստրալիայում սկսել են կորոնավիրուսի դեմ պատվաստանյութի փորձարկումները մարդկանց վրա: Mater Health Services բժշկական հետազոտությունների կենտրոնի տվյալներով, փորձին մասնակցում են 18-ից 59 տարեկան մոտ 130 կամավորներ:
Փորձարկումները սկսվել են NVX-CoV2373 պատվաստանյութի ստեղծող ամերիկյան կենսատեխնոլոգիական Novavax ընկերության վերահսկողության ներքո և անց են կացվում Մելբուրնում, ապա նաև Բրիսբենում: Ակնկալվում է, որ մարդու համար դեղամիջոցի անվտանգությունն ապացուցելուց զատ, փորձարկումը հետազոտողներին հնարավորություն կտա նաև առաջին եզրակացություններն անել պատվաստանյութի արդյունավետության վերաբերյալ:
«Հետազոտողները մշտապես ստուգելու են մասնակիցների արյունը՝ հակամարմինների տեսակը և քանակը վերահսկելու նպատակով: Հուսով ենք, որ մեր կամավորները բավականաչափ ուժեղ, վարակից պաշտպանելու ունակ իմունային պատասխան ցույց կտան»,- ասել է Mater Health Services ծառայության վարակիչ հիվանդությունների փորձագետ Փոլ Գրիֆինը:
Հաղորդվում է, որ NVX-CoV2373-ը «գենետիկ ինժեներիայի միջոցով ստեղծված ռեկոմբինանտ պատվաստանյութ է»: Պատվաստանյութի ստեղծողները նշել են, որ փորձարկումներին զուգընթաց սկսել են դեղամիջոցի արդյունաբերական արտադրությունը՝ թեստավորման հաջող արդյունքի հույսով:
«Եթե ամեն ինչ ընթանա ըստ նախատեսվածի, մենք պատրաստ կլինենք արդեն տարվա վերջին»,- Մելբուրնում կայացած մամուլի ասուլիսի ժամանակ ասել է Novavax-ի ներկայացուցիչ դոկտոր Գրեգորի Գլենը: