Թուրքիայի արտգործնախարար Մևլութ Չավուշօղլուն վերջերս հայտարարել էր, որ իրենց դիտարկումներով՝ Գերմանիայից, Ռուսաստանից ու Եվրոպայից Թուրքիա հանգստի մեկնել ցանկացողներ կան, և հավելել էր, որ իրենք չարտերային թռիչքների միջոցով կարող են այդ զբոսաշրջիկներին տեղափոխել Թուրքիա, անվտանգ կերպով կազմակերպել նրանց հանգիստը, ապա տեղափոխել իրենց երկրներ և ընդհուպ մինչև բնակության վայրեր։
Չավուշօղլուի այս հայտարարությունը տարակուսանք է առաջացրել Ռուսաստանում։
Ռուսաստանի զբոսաշրջային արդյունաբերության միության խոսնակ Իրինա Տյուրինան «ՌԻԱ Նովոստի»-ին տված հարցազրույցում, անդրադառնալով Չավուշօղլուի հայտարարությանը, ասել է․ «Անհասկանալի է, թե ինչու պետք է Թուրքիան ռուս զբոսաշրջիկների համար չարտերային թռիչքներ կազմակերպի այն դեպքում, երբ Ռուսաստանում հարյուրավոր ինքնաթիռներ սպասում են որևէ տեղից ուղևորափոխադրումներ անելու իրենց հնարավորությանը։ Հաշվի առնելով մեր երկրի համաճարակային վիճակը՝ պետք է սպասենք սահմանների բացվելուն»։
Տյուրինան նաև նշել է, որ կան ևս մեկ այլ հանգամանք․ այս պայմաններում բացի մի քանի բացառություններից օտար ավիափոխադրողները չեն կարող ռուս զբոսաշրջիկների համար չարտերային չվերթներ կազմակերպել։ Այսինքն ներկա իրավիճակում թուրքական ավիաընկերությունը չի կարող Ռուսաստանից չարտեր իրականացնել, կարող է միայն Թուրքիայից Ռուսատան ուղևոր բերել։