Չինաստանն անհիմն է համարում ԱՄՆ-ի հայտարարություններն այն մասին, որ ՉԺՀ-ն կարող է գողանալ COVID-19-ի դեմ ամերիկյան պատվաստանյութը, ճեպազրույցի ժամանակ ասել է Չինաստանի ԱԳՆ պաշտոնական ներկայացուցիչ Չժաո Լիցզյանը:
Ավելի վաղ, ԱՄՆ նախագահի ազգային անվտանգության հարցերով խորհրդական Ռոբերտ Օ’Բրայենը վստահություն էր հայտնել, որ Միացյալ Նահանգներին առաջինը կհաջողվի կորոնավիրուսի դեմ պատվաստանյութ ստեղծել: Միևնույն ժամանակ, նա չի բացառել, որ Չինաստանը կարող է ԱՄՆ-ից COVID-19-ի դեմ պատվաստանյութը գողանալու փորձ անել:
«ԱՄՆ-ի հայտարարություններն անհիմն են: Չինաստանը զգալի առաջընթաց է արձանագրել COVID-19-ի դեմ պատվաստանյութի մշակելու հարցում, մեր ինչի՞ն է պետք ԱՄՆ-ին հետևելը»,- ասել է դիվանագետը:
Նրա խոսքով, անկախ այն բանից, թե որ երկիրն առաջինը կավարտի պատվաստանյութի հետազոտության ու մշակման աշխատանքները և կսկսի դրա օգտագործումը, դա նշանակալի ներդրում կլինի համաճարակի դեմ մարդկության պայքարում: Գերատեսչության ներկայացուցիչը շեշտել է, որ COVID-19-ի դեմ պատվաստանյութի ուսումնասիրությունն ու մշակումը ոչ թե մրցավազք է ԱՄՆ-ի և Չինաստանի միջև, այլ մրցավազք՝ մարդկության և վիրուսի միջև:
«Չինաստանը պատրաստ է կիսել պատվաստանյութի հետազոտման և մշակման հարցում ունեցած իր փորձը, ամրապնդել միջազգային համագործակցությունն այս ոլորտում»,- նշել է նա: