ԱԺ անկախ պատգամավոր Արման Բաբաջանյանը դիմել է ՀՀ գլխավոր դատախազին Գեղարքունիքի մարզի Ճամբարակ համայնքում իրականացվող ապօրինի շինարարության փաստի առիթով։
«Առաջին լրատվական»-ը գրել է, որ համայնքում համայնքապետ Վազգեն Ադամյանի շինարարական կազմակերպությունը և վերջինիս ընկերները ապօրինի շինություններ են կառուցում, ինչն առաջացրել է համայնքի բնակիչների վրդովմունքը։ Համայնքապետը, սակայն, տարբեր պատճառաբանություններ է ներկայացնում, թե իբր շինարարությունը իրականացվում է օրինական կարգով։ Ընդ որում, ուշագրավ է, որ շինարարությունն էլ իրականացվում է «Սևան» ազգային պարկից հանված ավազով, ինչն արգելվում է։
Գլխավոր դատախազին ուղարկած գրության մեջ պատգամավորը նշել է, որ այն հողատարածքը, որի վրա իրականացվում է շինարարությունը, համայնքային նշանակության է, մինչդեռ այն 2020 թվականին օրինականացվել է։
Հատկանշական է, որ կառուցապատման իրավունքով հողամասը տրամադրելիս 2014 թվականին Ճամբարակ համայնքի ղեկավար Յու. Ավալյանի կողմից կազմվել է տեղեկանք այն մասին, որ հողամասը գտնվում է ՀՀ հողային օրենսգրքի 60-րդ հոդվածով սահմանված սահմանափակումների ցանկում, իսկ 2020 թվականի հունվարին Ճամբարակի համայնքապետ Վազգեն Ադամյանի կողմից նույն հողամասի վերաբերյալ կազմվել է տեղեկանք առ այն, որ հողամասը չի գտնվում ՀՀ հողային օրենսգրքի 60-րդ հոդվածով սահմանված սահմանափակումների ցանկում։
Նշված երկու տեղեկանքները, ըստ պատգամավորի, իրավունք վերապահող փաստաթղթեր են, և նրանցից մեկում մտցվել են կեղծ տեղեկություններ։ Հետևաբար պատգամավորը հարկ է համարել այդ երկու տեղեկանքներն էլ ուղարկել դատախազություն և գլխավոր դատախազին խնդրել է հանձնարարել նախապատրաստելու նյութեր և լուծելու ընթացքը։
