Հայաստանում ԱՄՆ դեսպան Լին Թրեյսիին ֆեյսբուքյան ուղիղ հեռարձակման ընթացքում հարց է ուղղվել Լեռնային Ղարաբաղի խնդրի կարգավորման վերաբերյալ։ Միացյալ Նահանգները համամի՞տ է Ռուսաստանի արտգործնախարար Սերգեյ Լավրովի վերջին հայտարարության հետ՝ հետաքրքրվել է օգտատերերից մեկը։
Հիշեցնենք, որ մոտ մեկ ամիս առաջ Սերգեյ Լավրովը հայտարարել էր, թե ղարաբաղյան խնդրի կարգավորման քննարկումների հիմքում փուլային սկզբունքներն են։ Առաջին փուլում, ըստ Լավրովի, պետք է ազատագրվեն Ղարաբաղի շուրջ մի շարք շրջաններ։
«Ուզում եմ շեշտել, որ Միացյալ Նահանգները շարունակում է ակտիվ ներգրավված մնալ այս աշխատանքներում՝ որպես ԵԱՀԿ Մինսկի խմբի համանախագահող երկիր։ Եվ, իհարկե, Ռուսաստանը երեք համանախագահներից մեկն է, և մենք փորձում ենք մեր աշխատանքը կառուցողական իրականացնել մյուս համանախագահների հետ։ Մենք շարունակում ենք հավատարիմ մնալ հակամարտության կարգավորմանն ուղղված միջնորդական մեր հանձնառությանը։ Որպես համանախագահ մեր խնդիրն է աջակցել, որ հակամարտությունը խաղաղ կարգավորում ունենա»,- պատասխանել է նա։
Ի դեպ, շեշտենք, որ ՌԴ արտգործնախարարի հայտնի հայտարարությունից հետո համանախագահող մյուս երկու երկրները՝ ԱՄՆ-ը և Ֆրանսիան, հակադարձող որևէ հայտարարությամբ հանդես չեն եկել։
Ամերիկագետ Սուրեն Սարգսյանի կարծիքով՝ Մինսկի խմբում բոլոր երեք կողմերը մշտապես ունենում են ընդհանուր համաձայնություն: «Ես չեմ հիշում մի դեպք, երբ Մինսկի խմբի համանախագահներից մեկը մի բան ասի, մյուսը՝ հակառակ ինչ-որ բան, որովհետև սովորաբար նրանք համաձայնեցնում են։ Եվ ամենակարևորը՝ Մինսկի խումբն այն ձևաչափն է, որտեղ աշխատում են ամերիկացիներն ու ռուսները»,- «Առաջին լրատվական»-ի հետ զրույցում ասաց նա։
Ինչ վերաբերում է Միացյալ Նահանգների դիրքորոշմանը, ապա մեր զրուցակցի կարծիքով՝ ո՛չ Միացյալ Նահանգները, ո՛չ Ֆրանսիան որևէ կերպ չհերքեցին Լավրովի խոսքերը. «Այսինքն՝ չհերքելով ցույց տվեցին նաև իրենց դիրքորոշումը՝ առ այն, որ նույնական է իրենց կարծիքը։ Մենք գործ ունենք մի իրավիճակի հետ, երբ Լավրովի ասածը որևէ մեկը չհերքեց, ինչն էլ նշանակում է, որ նրա ասածներն իրականությանը համապատասխանում են»։
Քաղաքագետ Լևոն Շիրինյանը հակառակ կարծիքն ունի։ Նրա դիտարկմամբ՝ ամերիկացիները հավանաբար հասկանում են ռուսական կողմի նկրտումները՝ անընդհատ Հայաստանը ներքաշել դժվար իրավիճակների մեջ. «Կարծում եմ՝ դեսպան Թրեյսին խոսել է դիվանագիտական լեզվով, և եթե կիսեր Լավրովի մոտեցումները, կարող էր հստակ այդ մասին ասել»: