Ֆուտբոլի Հայաստանի Բարձրագույն խմբի առաջնությունը վերսկսվեց։ 18-րդ տուրի շրջանակներում Գյումրի քաղաքային մարզադաշտում «Շիրակը» մրցեց «Լոռիի» հետ: Վանաձորյան ակումբին հաջողվեց խաղի հաշիվը բացել 39-րդ րոպեին: Աչքի ընկավ Մազյերոն: Երկրորդ կեսում «Լոռիի» կազմում աչքի ընկավ Արման Մկրտչյանը, իսկ «Շիրակին» հաջողվեց կրճատել հաշվի տարբերությունը: Գոլն իր ակտիվում գրանցեց Մորի Կոնեն։ Ավելի ուշ փոխչեմպիոն «Փյունիկը մրցեց գործող չեմպիոն «Արարատ-Արմենիա» հետ:
Ավանի ֆուտբոլի ակադեմիայի մարզադաշտում կայացած խաղում Հայաստանի գործող չեմպիոնն ակնհայտ առավելություն ուներ և 10 րոպեի ընթացքում երեք գնդակ ուղարկեց «Փյունիկի» դարպասը: «Արարատ-Արմենիայից» դուբլի հեղինակ դարձավ Օտուբանջոն, մեկ անգամ էլ աչքի ընկավ Սանոնգոն: Այս հաղթանակի շնորհիվ «Արարատ-Արմենիան» ամրապնդվեց մրցաշարային աղյուսակի առաջին հորիզոնականում վաստակած միավորների թիվը հասցնելով 36-ի: «Փյունիկը», որն արդեն կորցրել է վեցնյակում հայտնվելու և մրցանակային տեղերի համար պայքարելու հնարավորությունը, շարունակում է 23 միավորով մնալ 7-րդ տեղում: «Շիրակի» նկատմամբ տարած հաղթանակի շնորհիվ «Լոռին» իր միավորների թիվը հասցրեց 32-ի, հանգրվանելով երկրորդ հորիզոնականում։
Վանաձորի թիմը մեկ միավորով շրջանցեց «Ալաշկերտին», որը սակայն 18-րդ տուրի հանդիպումը չի անցկացրել: Ինչ վերաբերում է «Շիրակին», ապա Գյումրիի թիմը շարունակում է 28 միավորով մնալ 4-րդ հորիզոնականում։ Ի դեպ, ֆուտբոլի Հայաստանի ազգային թիմի գլխավոր մարզիչ Խոակին Կապառոսը Իսպանիայից հետևել է երեկ կայացաց մրցավեճերին: Տեղեկությունը տարածել է Հայաստանի ֆուտբոլի ֆեդերացիան հրապարակելով նաև լուսանկար, որում իսպանացի մասնագետը հեռուստացույցով հետևում է «Շիրակ»-«Լոռի» խաղին: Կորոնավիրուսի համավարակի պատճառով Կապառոսը Սևիլիայում է և դեռևս չի վերադարձել Հայաստան: Իսկ ինչպես կարելի է գնահատել մոտ երկու ամիս դադարից հետո մեր առաջնության մեկնարկը։ Օբյետկտիվորեն, թիմերի մոտ բացակայում է թարմությունն ու դինամիկան։ Սա այն շրջանն է, երբ ֆուտբոլիստների հասնում են մարզավիճակի այսպես կոչված «պիկին»։
Տևական ժամանակ չմարզվելու և խաղային պրակտիկա չունենալը չէր կարող իր ազդեցությունը չթողնել։ Ընդունեք, որ դինամիկայի անկում է նկատվում նույն Գերմանիայի առաջնությունում, որը վերսկսվել էր մեկ շաբաթ առաջ։ Ամեն դեպքում շարք վերադառնալուն պես համոզվեցինք, որ «Արարատ-Արմենիան» շարունակում է մնալ չեմպիոնի կոչման գլխավոր հավակնորդներից մեկը, եթե ոչ գլխավորը։ Այս թիմը գրեթե բոլոր առումներով գերազանցեց «Փյունիկին»։ Սա առաջինը խոսում է «Արարատ-Արմենիայում» առկա բարձր պրոֆեսիոնալ մթնորորտի մասին։ Թե կազմով, թե խաղային գրագիտությամբ «Արարատ-Արմենիան» մեկ քայլ առաջ է մյուս թիմերից։
«Փյունիկի» նկատմամբ տարած հաղթանակը ևս մեկ քայլ էր դեպի չեմպիոնություն։ Նույն ոգով շարունակելու պարագայում, կարծում ենք երևանյան թիմը չի զիջի առաջին հորիզոնականը։
