ԱԱԾ նախկին տնօրեն Արթուր Վանեցյանը, անդրադառնալով Հայաստանում կորոնավիրուսի թափ առնող ալիքին, Թվիթերի իր էջում առաջարկ է արել ստեղծել հակաճգնաժամային կառավարություն. «Վարակի տարածման ահագնացող տեմպը, տնտեսական և սոցիալական լարվածության էական աճը լուրջ սպառնալիք են մեր երկրի համար։ Հումանիտար աղետից խուսափելու համար անհրաժեշտ է նոր՝ հակաճգնաժամային կառավարություն, որը, համախմբելով բոլոր կարող ուժերը, դուրս կբերի երկիրը այս ծանր իրավիճակից»,- գրել է Վանեցյանը։
Զարմանալի զուգադիպությամբ ճգնաժամից դուրս գալու առաջարկություններով մեկ օր առաջ հանդես եկավ Վատիկանում ՀՀ նախկին դեսպան Միքայել Մինասյանը՝ առաջարկելով քաղաքական մեծամասնությանը իր թիմի ներսից ընտրել նոր վարչապետ։
Քաղաքագետ Ռոբերտ Ղևոնդյանի կարծիքով՝ Միքայել Մինասյանի հայտարարությունը կարելի է մի տեսության հետ համեմատել: «Երբ փորձում են գտնել ամենաուժեղ կետը թիմի մեջ ու այն հեռացնել, մնացածն ինքն իրեն կփլվի։ Ցանցակենտրոն պատերազմ՝ այսպիսի տերմինով է բնութագրվում երևույթը, ինչը նշանակում է, որ ցանցն ունի կենտրոն, այն հեռացնելուց հետո մյուս հատվածներն իրենք իրենց փլվում են։ Այնուամենայնիվ, մեր քաղաքական իրականությունը շատ հեռու է Մինասյանի նկարագրած իրավիճակից, որի արդյունքում կարող է իշխող թիմը գնալ այդպիսի քայլի։ Չմոռանանք մի կարևոր հանգամանք՝ իշխանության լեգիտիմության հիմնական աղբյուրը Նիկոլ Փաշինյանն է, ու նրան հեռացնելուց հետո իշխանության մնացած հատվածն ինքը կփորի իր գերեզմանը»,- «Առաջին լրատվական»-ի հետ զրույցում ասաց նա։
Ինչ վերաբերում է Վանեցյանի առաջարկությանը, ապա մեր զրուցակցի կարծիքով՝
նա երկրորդում է Մինասյանին. «Այդ բևեռի խաղացողների կողմից փորձ է արվում ստեղծել տպավորություն, թե Հայաստանի քաղաքական դաշտում կա նման օրակարգ։ Իրականում նման օրակարգ չկա, ու այդ մարգինալացված խմբերի ներկայացուցիչներն ինչ էլ հայտարարեն՝ քաղաքական իրականությունը բոլորովին այլ է»։
Ղևոնդյանն ընդգծեց՝ խաղացողների այդ բևեռը մարգինալ է, սոցիալական կապիտալն էլ չի աճում. «Եվ սա՝ անկախ այն բանից, որ իշխանության նկատմամբ վստահություն ունեցողների քանակը պակասում է։ Հիասթափվածները չեն գնում այդ բևեռ, քանի որ այն ունի շատ վատ հեղինակություն, կապված է նախկինների հետ, այդ իսկ պատճառով այդ բևեռի սոցիալական կապիտալը չի աճում։ Նրանք հնարավորություն չունեն ապահովելու այնպիսի սոցիալական կապիտալ, որով կարող են փոփոխություններ առաջացնել երկրում։ Իմ կարծիքով՝ նրանց հայտարարությունները միայն տպավորություն ստեղծելու նպատակ ունեն՝ ավելի հեռահար ժամկետի համար։ Որոշ ժամանակ հետո գուցե այդ տպավորությունների հիման վրա ինչ-որ գործընթացներ փորձեն սկսել, սակայն այս պահին նրանց հայտարարածները իրականություն դառնալ չեն կարող»։
ԳԽ պատգամավոր Վիգեն Խաչատրյանի կարծիքով՝ Վանեցյանի և Միքայել Մինասյանի կոչերի արձագանքները լուրջ լինել չեն կարող: «Ես լուրջ չեմ համարում այդպիսի բաները։ Բոլոր նրանք, ովքեր առաջին օրվանից ուզում են վիժեցնել նոր Հայաստանի մոտեցումները, մի ընդհանուր խնդիր ունեն՝ ձերբազատվել Փաշինյանից, ու այդ առումով նրանց միջև ընդհանուր բան կա»,- «Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցն ընդգծեց. «Այդ նպատակն ընդամենը իրենց մասնավոր շահն է սպասարկում, հասարակական շահի հետ կապ չունի»։
Վիգեն Խաչատրյանը չի բացառում նաև արտաքին ազդեցությունը. «Հասարակության մեծամասնությունն այսօր իշխանություններին իրական այլընտրանք չի տեսնում, ուստի նման նախաձեռնությունները դատապարտված են անհաջողության։ Բացի դրանից՝ այդ մարդիկ լավ պատկերացում չունեն, թե ինչ է նշանակում ժողովրդավարություն։ Հերթական ընտրություններին պատրաստվելու փոխարեն՝ չգիտես ինչով են զբաղված»։