Հայաստանը և Բելառուսը Ռուսաստանին առաջարկել էին ԵԱՏՄ-ում գազի փոխադրման և տարանցման միասնական սակագին սահմանել: Եվրասիական Բարձրագույն խորհրդի տեսակոնֆերանսի ժամանակ ՌԴ նախագահ Պուտինն անդրադառնալով գազի գնի վերաբերյալ հարցադրումներին՝ անհամաձայնություն հայտնեց՝ հայտարարելով, որ ԵԱՏՄ տարածքում քանի դեռ չկա միասնական բյուջե և միասնական հարկային համակարգ, անհնար է խոսել գազի տարանցիկ փոխանցման միասնական սակագնի մասին:
Միասնական բյուջե և միասնական հարկային համակարգ ունենալը նշանակում է նաև ինքնիշխանության տարրերի զիջում: Ռուսաստանում չե՞ն ընդունում, որ անցել են այն ժամանակները, երբ Հայաստանը էներգետիկ խնդիրները լուծելու համար ինքնիշխանության գին էր վճարում:
Թեմայի շուրջ «Առաջին լրատվական»-ի հետ զրույցում, անդրադառնալով այս հարցին, Երևանի մամուլի ակումբի նախագահ Բորիս Նավասարդյանը նշեց, որ չպետք է շատ կոնկրետ ընկալել Պուտինի փաստարկները կամ հանդիպակաց առաջարկները. «Դրանք կարող են սիմվոլիկ լինել, այսինքն՝ Պուտինը, որպեսզի հիմնավորի իր մերժումը, պետք է ինչ-որ պայմաններ դնի կամ բացատրություններ տա: Ավելի լայնորեն դիտարկելով՝ կտեսնենք, որ մենք հստակ ակնարկ ստացանք, որ մեզանից ակնկալվում է մշտական ինչ-որ ծառայությունների մատուցում, և դա Հայաստանի համար մեծ խնդիր է… Մենք Մոսկվային տալիք չունենք… Մենք պետք է պատրաստ լինենք առանց Ռուսաստանի բարեհաճության լուծել մեր խնդիրները՝ հիմնականում հենվելով ներքին ռեսուրսների վրա»:
Մանրամասն՝ տեսանյութում
