Լիբիայում գտնվող բոլոր թուրքական օբյեկտները օրինական թիրախ կդառնան Լիբիայի ազգային բանակի (ԼԱԲ) համար: Այս մասին հայտարարել է ԼԱԲ ռազմական օդուժի շտաբի ղեկավար Սաքր ալ-Ջարուշին, որի խոսքերը մեջբերել է Africa Gate News կայքը: Լիբիայի հակամարտության երկրորդ կողմի՝ Տրիպոլիի ներկայացուցիչները կարծում են, որ հարձակողական ծրագրերը կապված են ԼԱԲ-ին Ռուսաստանից կործանիչների մատակարարման հետ:
Ըստ գեներալ ալ-Ջարուշիի, նրան ենթակա ռազմական օդուժը պատրաստվում է երկրի պատմության մեջ խոշորագույն օդային գործողությանը: «Առաջիկա ժամերը խիստ տանջալից կլինեն խենթի և նրա կողմնակիցների համար»,- ասել է Սաքր ալ-Ջարուշին՝ նկատի ունենալով Թուրքիայի նախագահ Ռեջեփ Թայիփ Էրդողանին: Գեներալը կոչ է արել Լիբիայի քաղաքացիական բնակչությանը «հեռու մնալ օբյեկտներից», որոնք կարող են ռազմական ավիացիայի թիրախ հանդիսանալ:
Իր հերթին, Թուրքիայի արտգործնախարարությունը նախազգուշացրել է, որ Լիբիայում տեղակայված իր օբյեկտների վրա որևէ հարձակում անպատասխան չի թողնի, այդ թվում, հարվածի տակ կարող է հայտնվել նաև ֆելդմարշալ Խալիֆա Հաֆթարի կենտրոնական գրասենյակը: