Ազգային ժողովը Սահմանադրական դատարանի շուրջ ստեղծված ճգնաժամը որոշել է հանգուցալուծել նոր տարբերակով, քննարկվում է այդ տարբերակը: Առայժմ հայտնի է, որ նախատեսվում է դադարեցնել ՍԴ այն դատավորների լիազորությունները, ովքեր արդեն պաշտոնավարել են 12 տարի:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Նիկոլայ Բաղդասարյանը, փաստաբան Գևորգ Դավթյանը, ՀԱԿ իրավական հարցերի պատասխանատու Արմեն խաչատրյանը:
Նիկոլայ Բաղդասարյանի խոսքով՝ բացի նրանից, որ նախատեսվում է դադարեցնել այն դատավորների լիազորությունները, որոնք պաշտոնավարել են 12 տարի, նաև Հրայր Թովմասյանը չի կարող լինել ՍԴ նախագահ, քանի որ նա այդ պաշտոնում է նշանակվել ոչ օրինական ճանապարհով. «Արհեստական անցումային դրույթներ են ստեղծել, և դրանց շնորհիվ դարձել է ՍԴ նախագահ»:
«Հարցը հանրաքվեով հնարավոր չէ լուծել, քանի որ հանրային առողջությանը վնասելու վտանգ կա: Սահմանադրական դատարանի ճգնաժամի լուծումը մնում է Ազգային ժողովի տիրույթում»,- նշեց պատգամավորը՝ հավելելով, որ այս լուծումով Սահմանադրական դատարանը կունենա լեգիտիմություն:
«Մենք ուզում ենք շատ, ստանում ենք քիչ: Մենք ուզում ենք ունենալ ամբողջությամբ լեգիտիմ Սահմանադրական դատարան, որը կազմված կլինի 2015թ. ընդունված Սահմանադրությամբ նախատեսված լիազորություններով օժտված ՍԴ դատավորներից»,- նշեց Արմեն Խաչատրյանը:
Գևորգ Դավթյանի դիտարկմամբ՝ հանրաքվեի ճանապարհով գնալու նպատակը 213-րդ հոդվածի փոփոխությունն էր, որով վերջնականապես հարցին լուծում կտրվեր. «Սակայն կորոնավիրուսի համաճարակի հետ կապված՝ փաստացի այնպիսի իրավիճակ ստեղծվեց, որ անհրաժեշտություն առաջացավ մտածել՝ ինչ նոր քայլեր ձեռնարկել: Շատ նորմալ է և բնական է, որ խնդրի լուծումը ԱԺ տիրույթ է տեղափոխվել, և Սահմանադրությամբ այդ հնարավորությունը տրված է… Բայց այս տարբերակով 213-րդ հոդվածի հարցը չի լուծվում, այսինքն՝ կարծեք թե խնդրին կիսալուծում է տրվում, կարծում եմ՝ կարելի է առաջ քաշել ԱԺ-ում 213-րդ հոդվածի փոփոխության հարցը»:
Մանրամասն՝ տեսանյութում: