Հայաստանում ԱՄՆ դեսպան Լին Թրեյսին այսօր առցանց ասուլիս է տվել, խոսել ամերիկյան կառավարության հետ Հայաստանի համագործակցության, կորոնավիրուսի համավարակով պայմանավորված իրավիճակից բխող դժվարությունները համատեղ ուժերով հաղթահարելու մասին, նաև պարզաբանել է, թե երբ կարող են մարդիկ դիմել ԱՄՆ մուտքի թույլտվություն՝ վիզա ստանալու համար:
«Միացյալ Նահանգները կասեցրել է վիզաների տրամադրման ծառայությունը ԱՄՆ բոլոր դեսպանատներում: Կարծում եմ, որ մենք հնարավորինս շուտ կվերսկսենք այդ ծառայությունների մատուցումը, սակայն այս պահին հստակ ժամկետներ ասել չենք կարող: Եթե ձեր հարցազրույցը չեղարկվել է, այդ մասին ձեզ տեղեկացրել են էլեկտրոնային փոստով կամ հեռախոսով, իսկ եթե արդեն վճարել եք միջնորդավճարը, տվյալ երկրում այն կարող է օգտագործվել մեկ տարվա ընթացքում: Եթե այլ հարցեր ևս ունեք, վիզաների հետ կապված, խնդրում ենք այցելել մեր պաշտոնական կայքէջ, վիզաների բաժին, որտեղ կան թարմ տեղեկություններ, իսկ եթե կոնկրետ գործերի մասին հարցեր ունեք, առաջարկում ենք կապվել հյուպատոսական անձնակազմի հետ»,- ասել է դեսպանը: