Հայաստանում անցած մեկ օրում կորոնավիրուսի դեպքերի թիվն աճել է 335-ով՝ հասնելով 5 հազար 606-ի, գրանցվել է հիվանդությունից մահվան ևս 3 դեպք, հաղորդում է Առողջապահության նախարարության Հիվանդությունների վերահսկման և կանխարգելման ազգային կենտրոնը: Հիվանդությունից բուժվածների թիվն ավելացել է 162-ով և հասել 2 հազար 581-ի: Ըստ նույն աղբյուրի՝ իրականացված թեստավորումների ընդհանուր թիվը 45 հազար 822 է: Մահվան դեպքերի վերաբերյալ Առողջապահության նախարարությունը հայտնում է. «Բուժառուները եղել են 64, 65, 90 տարեկան և ունեցել են ուղեկցող քրոնիկական հիվանդություններ»: Մահացածների ընդհանուր թիվը 70 է։
Կորոնավիրուսով վարակված ևս 27 անձ, ըստ Առողջապահության նախարարության, մահացել է այլ պատճառներով: Այսպիսով, կորոնավիրուսային հիվանդությունից տվյալ պահին Հայաստանում բուժվում է 2 հազար 928 մարդ: Կառավարության այսօրվա նիստում թվերին անդրադարձել է վարչապետը՝ նշելով՝ մեր գործերը լավ չեն։ Ի դեպ, գործերը լավ չեն ոչ միայն մեզ մոտ։ Անցած 1 օրում աշխարհում, ընդհանուր հաշվարկով COVID-19-ի 106 հազար նոր դեպք է գրանցվել: Սա համաճարակի բռնկումից ի վեր վարակման ամենամեծ թիվն է աշխարհի մակարդակով: Աշխարհում կորոնավիրուսի վարակի դեպքերի թիվը հասել է արդեն 5 միլիոնին, ավելի քան 324 հազար մարդ է մահացել, բուժվել է մոտ 1 միլիոն 690 հազարը:
Թեմայի շուրջ «Առաջին լրատվական»-ը զրուցել է ԵՊԲՀ բժշկական հոգեբանության ամբիոնի վարիչ Խաչատուր Գասպարյանի հետ:
Մանրամասն՝ տեսանյութում: