Բազմիցս խոսվել է հեռուստատեսության ոլորտում փոփոխությունների անհրաժեշտության մասին: Տեղի են ունեցել խորհրդարանական լսումներ, ներգրավված են եղել ոլորտի փորձագետներ. ստեղծվել է օրենքի նոր նախագիծ, որը միտված է լուծելու ոլորտի խնդիրները: Առաջիկայում ուժի մեջ կմտնի «Տեսալսողական մեդիայի մասին օրենքի» նախագիծը, որը կփոխարինի «Հեռուստատեսության և ռադիոյի մասին օրենքին»: Թեմայի շուրջ «Առաջին լրատվական»-ը զրուցել է Հեռուսատեսության և ռադիոյի հանձնաժողովի նախագահ Տիգրան Հակոբյանի հետ:
«…Բոլոր առաջադեմ պետությունները անցել են տեխնիկական կարգավորումների և բովանդակային վերահսկողության… Ազատությունը բերում է նաև մանիպուլյատիվ հնարքների կամ ապատեղեկատվության աճի տեմպի, եթե վերահսկողություն չկա: Նախկինում ամբողջ աշխարհում ունիվերսալ բովանդակային սահմանափակումները քիչ էին՝ օրինակ՝ ռասսայական, ազգային խտրականությունը կամ բռնության, սահմանադրական կարգը տապալելու կոչերը, իսկ այժմ բովանդակային սահմանափակումները վերաբերում են մարդկանց իրավունքները պաշտպանելուն՝ այսինքն՝ նոր օրենքի նախագծում կան դրույթներ, որոնք երաշխավորում են պատասխան խոսքի իրավունքը: Եվ եթե լրատվամիջոցը թիրախավորում է մեկին և վարկաբեկում, ապա թիրախավորված անձը կամ կազմակերպությունն ունի պատասխան խոսքի իրավունք… Պետք է ներկայացվեն տարբեր կոմերի հակառակ տեսակետները, դրանով փորձ է արվում բալանսավորել բոլոր տեսակետները, կարծիքները և դրանով ամրապնդվում է խոսքի ազատությունը: Ցավոք շահարկումներ կան:
Աշխարհում հասկացել են, որ մեդիագրագիտությունը կամ ինքնակարգավորումները չեն աշախատում և որոշել են կոշտ կանոնակարգման տարրեր մտցնել օրենքի մեջ, մինչև որ հասարակությունները կսովորեն ինքնակարգավորման հայեցակարգը: Նոր օրենքը հեռուստաընկերությանը պարտադրում է տալ ստուգված, ճշգրիտ, մի քանի աղբյուրից ճշտված տեղեկություն և պաշտպանում է մարդու իրավունքը՝ ստանալ օբյեկտիվ տեղեկատվություն»,- նշեց Տիգրան Հակոբյանը:
«Մենք առաջարկել ենք, որ յուրաքանչյուր հեռուստատեսություն ունենա հանրօգուտ հաղորդումների բաղադրիչ՝ կրթական, մշակութային, մանկական հաղորդումներ, ինչը շատ կարևոր է հասարակության զարգացման համար»,- նշեց Հեռուսատեսության և ռադիոյի հանձնաժողովի նախագահը:
Մանրամասն՝ տեսանյութում:
