Ուկրաինան ներդրումային գրասենյակ կբացի 2020-ի սեպտեմբերին՝ Աջարիայի կառավարության նախկին ղեկավար Լևան Վարշալոմիձեի ղեկավարությամբ, հաղորդել է երկրի նախագահ Վլադիմիր Զելենսկին: «Կարող եմ ասել ներդրումային գրասենյակի մասին, որը մենք կբացենք սեպտեմբերի վերջին: Գրասենյակը կղեկավարի պարոն Վարշալոմիձեն, որը կառուցել է Բաթումին»,- ասել է նա Կիևում կայացած մամուլի ասուլիսի ընթացքում:
Գրասենյակը ներկայումս կադրային փոփոխությունների փուլում է, հավելել է նախագահը: «Մենք որոշել ենք, որ մեկ առանձին թափանցիկ ներդրումային գրասենյակ կաշխատի արդեն սեպտեմբերին: Եվ միայն այդ գրասենյակը կզբաղվի բոլոր ներդրումներով: Ես արդեն համաձայնեցրել եմ առաջին ծրագիրը… 18 ամսում 7 միլիոն դոլարի չափով արագ ներդրումների ծրագիր է»,- մեկնաբանել է Զելենսկին:
«Ինչ վերաբերում է ներդրումային դայակին, ի դեպ, մենք այստեղ ինչ-որ բան փոխել ենք, քանի որ հիմա աշխարհում պետք է պայքարել ներդրումների համար… Մենք պայքարելու ենք դրանց համար. մենք իջեցրել ենք նշաձողը»,- նշել է նա:
Վարշալոմիձեն Միխայիլ Սահակաշվիլիի համախոհներից է, որն այժմ զբաղեցնում է Ուկրաինայի բարեփոխումների գործադիր կոմիտեի ղեկավարի պաշտոնը: