Դիմակների կրումը փակ տարածքներում պարտադիր է լինելու այնքան, որքան անհրաժեշտ է իրականացնել հակահամաճարակային միջոցառումներ՝ վիրուսի տարածումը կանխելու համար։ Մամուլի ասուլիսի ժամանակ ասաց ՀՀ առողջապահության նախարար Արսեն Թորոսյանը՝ անդրադառնալով դիմակների պարտադիր առկայությանը։
Նախարարը չբացառեց նաև, որ դա կարող է լինել մեկ կամ երկու տարի. «Մենք պետք է պատրաստ լինենք երկարատև պայքարի։ Չի նշանակում, որ դիմակները պետք է կրել այնպես, ինչպես որևէ մեկի մտքով կանցնի։ Կան դիմակ կրելու կանոններ՝ սկսած դիմակը հանել-դնելուց և պետք է այդ մշակույթը, սովորույթը մեր մեջ ձևավորենք այնպես, ինչպես օրինակ ամեն առավոտ և երեկո լվանում ենք մեր ատամները։ Կլինեն մարդիկ, որ նաև առողջական պատճառներով չեն կարողանա դիմակ կրել։ Ես ենթադրում եմ, որ այդ մարդիկ պետք է հսկողության տակ լինեն, այլ ոչ թե ինչ-որ աշխատավայրում օրինակ վտանգի ենթարկեն այլոց առողջությունը»,-ասաց նախարարը։