Սիրիայի քրդաբնակ Քամիշլո քաղաքում տեղի ունեցած համագումարի ժամանակ Սիրիայի հյուսիսում գործող 25 քրդական կուսակցություններ ու քաղաքական շարժումներ միավորվել են «Քրդական ազգային միության կուսակցություններ» անվանումով մեկ ընդհանուր կառույցի մեջ։
Կառույցի վերաբերյալ արված հայտարարության մեջ նշված է, որ այն հետևելու է քրդերի միասնականությանն ուղղված գործողություններին։ «Քրդական ազգային միության կուսակցություններ» կազմակերպությունն ունենալու է կոմիտե, որը ձևավորվելու է մասնակից կազմակերպությունների ներկայացուցիչներից և կանոնավոր կերպով նիստեր է անցկացնելու՝ «ցամաքում» տեղի ունեցող զարգացումները քննարկելու համար։
Նշվում է, որ այս կառույցի հիմնադրումը նախաձեռնել է «Սիրիայի դեմոկրատական ուժեր» անվանումով, հիմնականում քրդերից բաղկացած կանոնավոր զինված ուժերի հրամանատարությունը։