ՌԴ տրանսպորտի նախարարությունը օդանավակայաններին սուբսիդիաներ տրամադրելու կանոններ է մշակել՝ կորոնավիրուսի համաճարակի պատճառով կրած կորուստների փոխհատուցման համար: Այս մասին գրում է «Կոմերսանտը»՝ հղում անելով փաստաթղթին:
Գումարները բաշխվելու են նախորդ տարվա նույն ժամանակահատվածի համեմատ ուղևորահոսքի նվազմանը համամասնորեն: «Կորցրած» յուրաքանչյուր ուղևորի համար կառավարությունը կհատկացնի 195.4 ռուբլի:
Օդանավակայանները պարտավորվելու են միջոցների առնվազն 60%-ը տրամադրել աշխատակիցների աշխատավարձերի և ապահովագրավճարների վճարմանը: Մնացած գումարը կարող են ծախսվել շենքերի, սարքավորումների և տրանսպորտային միջոցների պահպանման և շահագործման վրա:
Friendly Avia Support-ի գլխավոր տնօրեն Ալեքսանդր Լանեցկիի խոսքով, 195.4 ռուբլին զգալիորեն քիչ է, քան իրական ուղևորի «գինը»: Նա կարծում է, որ 2020 թ.-ի երրորդ եռամսյակում լավ արդյունք կլինի անցած տարվա 25%-ի, չորրորդում՝ 50%-ի մակարդակի ուղևորահոսքի ապահովումը: