Հայաստանում կորոնավիրուսի դեմ պայքարի այս փուլը գնահատվում է որպես ամենապատասխանատու փուլ. բացվում է տնտեսությունը, քանի որ այն այլևս փակ մնալ չի կարող, իսկ վարակը, ըստ մասնագիտական դիտարկումների, դեռ չի մոտեցել վիճակագրական պիկին: Եվ այս ֆոնին Հայաստանում նկատելի է ներքաղաքական աշխուժություն:
Այս թեմաների շուրջ «Առաջին լրատվական»- ի հետ քննարկմանը մասնակցեցին քաղաքագետ Արմեն Վադանյանը, վերլուծաբան Արիս Վաղարշակյանը և կառավարման հարցերի փորձագետ Հայկ Այվազյանը:
Քննարկման մասնակիցների դիտարկմամբ՝ դեռևս վաղ է գնահատել՝ կառավարության քայլերն իրավիճակին համարժեք են, թե ոչ: «Առավել կարևոր է, թե ինչ ստրատեգիա են ընտրել կորոնավիրուսի դեմ պայքարելու կամ այդ վարակի հետ ապրելու համար»,- նշեց Հայկ Այվազյանը՝ հավելելով, որ համավարակի դեմ ապակենտրոն պայքարի համար ռեսուրսներ չի տեսնում:
Արմեն Վարդանյանի կարծիքով՝ սկզբնական շրջանում իշխանություների մոտ անլրջություն կար, և ինչ-որ առումով քննադատելը սխալ կլինի, քանի որ կորոնավիրուսը նոր, աննախադեպ երևույթ էր ամբողջ աշխարհի համար, և իրավիճակը լավ չէին պատկերացնում. «Հետագայում իշխանությունը, հասկանալով, որ վտանգավոր համավարակ է, սկսեց լրջորեն մոտենալ խնդրին, և հիմա ձեռքը պուլսի վրա է պահում ու տիրապետում է իրավիճակին: Հույս կա, որ իրավիճակը վերահսկողությունից դուրս չի գա»:
Անդրադառնալով ներքաղաքական զարգացումներին՝ Հայկ Այվազյանը նշեց. «Սպասելի էր, որ այս իրավիճակում հապաղումներ ու բացթողումներ կլինեն իշխանության կողմից, բայց այս դժվարին իրավիճակում դրանից օգտվելը ապազգային նպատակների մասին է վկայում, ոչ թե երկիրն այս վիճակից հանելու մասին… Այս փուլում համախմբվածություն պետք է դրսևորվեր, ինչը չտեսանք»:
Արմեն Վարդանյանի գնահատմամբ՝ այն, ինչ տեղի է ունենում քաղաքական դաշտում, առճակատում չէ. «Իշխանության և որոշ քաղաքական ուժերի միջև պայքարը բաց առճակատման բնույթ չի կրում, այլ ավելի շատ ապատեղեկատվության միջոցով է տեղի ունենում»:
Արիս Վաղարշակյանի կարծիքով՝ ինչ-որ մի պահի սադրիչները կմիավորվեն: Փորձ է արվում իշխանությունը ներսից կազմաքանդել: Հայկ Այազյանի դիտարկմամբ՝ այդ զարգացումների հիմնական պատճառներից է այն, որ իշխանությունը հեղափոխական կեցվածքից հեռանում է, և այդ ամենը միայն հռետորաբանության մեջ է մնում. «Իշխանությունը չպետք է շեղվի սեփական հեղափոխական օրակարգից»:
Մանրամասն՝ տեսանյութում: