Լուրեր
Զբոսաշրջության ոլորտի ձայնը լսելի չէ, անորոշությունը կսպանի ոլորտը
  • 09:40
  • 2020-05-21
  • Դիտումներ՝ *

Կորոնավիրուսային համավարակով պայմանավորված՝ աշխարհում երկրների մեծ մասը փակ սահմաններով է շարունակում ապրել։ Թեև տնտեսությունը Հայաստանում գործարկվում է, սակայն մենք նույնպես շարունակում ենք ապրել արտակարգ դրության պայմաններում։

Ի՞նչ իրավիճակ է հիմա զբոսաշրջության ոլորտում, ինչպե՞ս է այն գոյատևում․ «Առաջին լրատվական»-ի հարցին «Լաքշրի վոյաժ» ընկերության տնօրեն Աննա Դավիդյանը պատասխանեց․ «Իրոք, մեր ոլորտն այսօր ամենավատ ու ծանր դրության մեջ է հայտնվել, ցավոք, բայց դա պայմանավորված չէ Հայաստանում տիրող իրավիճակի հետ։ Դա համաշխարհային խնդիր է։ Համաշխարհային տնտեսության բոլոր ոլորտներն էլ տուժել են, սակայն մեր ոլորտն ամենաշատն է տուժել։ Եթե ոլորտներ կան, որոնք կարող են մի քիչ ավելի շուտ վերականգնվել, ապա մեր ոլորտը, ըստ միջազգային մասնագետների՝ լավագույն դեպքում առաջին հոսքը կարող ենք սպասել աշնանը, հետո արդեն՝ մյուս տարի։ Այսինքն՝ հուսանք, որ ամեն ինչ այնքան լավ կլինի, որ աշնանը ինչ-որ երկրներից, որտեղ սահմանափակումները կհանվեն, և մեր վիճակն էլ այնպիսին կլինի, որ կկարողանանք ընդունել զբոսաշրջիկներին։ Սակայն մեր ոլորտն ունի շատ խնդիրներ։ Զբոսաշրջությունը կարելի է բաժանել երեք խմբի՝ ներգնա, արտագնա և տեղային։ Այսօր այս բոլոր երեք խմբերում էլ առկա են խնդիրներ, և մենք, ցավոք, չենք կարողանում այս պահին այդ խնդիրները հասկանալ՝ ինչ կարող ենք սպասել, ինչ ռազմավարություն կլինի և երբ կկարողանանք բացել մեր սահմանները։ Եթե ինչ-որ երկրներ հայտարարել են իրենց ռազմավարությունը, ապա մեր երկրում առայժմ չկա այդ ռազմավարությունը»։

Իսկ «Արմենիա թրավել» ընկերության տնօրեն Արմեն Գրիգորյանն ասաց․ «Իհարկե, ես համաձայն եմ իմ կոլեգայի հետ։ Բոլորն ասում են, որ զբոսաշրջությունը ծանր իրավիճակում է հայտնվել, և այդ առումով մենք պետք է հասկանանք, թե ինչ միջոցառումներ պետք է իրականացվեն։ Պետությունը փորձում է միջոցառումներ իրականացնել տնտեսության համար, սակայն դրանք պետք է նպատակային լինեն, և հասկանալի լինի ոլորտների և կոնկրետ ենթաոլորտների կարևորությունը։ Ճիշտ է՝ զբոսաշրջությունը երեք խմբի է բաժանվում, բայց մեր երկրի համար կարևոր է ներգնա զբոսաշրջությունը, որը մեզ ապահովում է ֆինանսական հոսքեր»։

 

 

Մանրամասները՝ տեսանյութում։

  • Դիտումներ՝ *