Մոսկվայում բնակվող Խաչատուրյան քույրերը, որոնք մեղադրվում են իրենց հոր սպանության համար, ՄԱԿ-ի կանանց նկատմամբ բռնության հարցերով հատուկ զեկուցող Դուբրավկա Սիմոնովիչին խնդրել են դիմել ռուսական իշխանություններին իրենց քրեական գործի դիտարկման շրջանակում կրկնակի տրավմայի չենթարկելու և դատավարական իրավունքները չխախտելու պահանջով: Քույրերից կրտսերի փաստաբան Վալենտինա Ֆրոլովան ՏԱՍՍ գործակալության հետ զրույցում նշել է, որ դրա համար հարկավոր է քույրերի գործերը քննել միայն միասնական տարբերակով և հաշվի առնել, որ նրանք գործել են անհրաժեշտ ինքնապաշտպանության շրջանակում:
«Քննչական մարմինները բաժանել են քույրերի քրեական գործը` Մարիա Խաչատուրյանի գործն առանձնացնելով, ինչը բացասաբար է անդրադարձել մեղադրյալների իրավունքների վրա: Չնայած այն հանգամանքին, որ երկու քրեական գործերում քննվում են նույն հանգամանքները, Քրիստինան և Անգելինան չեն կարողանում մասնակցել Մարիայի քրեական գործին, այնպես, ինչպես Մարիան չի կարողանում մասնակցել Քրիստինայի և Անգելինայի գործին: Ապագայում դա կբերի քույրերի կրկնակի տրավմայի ենթարկվելուն, քանի որ նրանք ստիպված կլինեն պատմել նույն ծանր տրավմատիկ իրադարձությունները երկու քրեական գործերի քննման ժամանակ»,-ասել է փաստաբանը: