ԱԺ «Իմ քայլը» խմբակցության պատգամավոր Համազասպ Դանիելյանը դատապարտում է Տաթևիկ Ռևազյանի և նրա նորածին դստեր հասցեին հնչեցված ատելության խոսքը, ապա հույս հայտնում, որ ԱԺ-ի կողմից վերջերս ընդունված օրենքը, որը միտված է պայքարելու ատելության խոսքի դեմ, շուտով իր արդյուքները կտա։ Անդրադառնալով կորոնավիրուսի տարածման տեմպերին՝ նշում է․ «Իրավապահ մարմինները թերացել են»։
Պատգամավորը զարմանքով է արձանագրում, որ այսօր կան մարդիկ, որոնք չեն հավատում այս վիրուսին և դրանով վտանգի տակ դնում սեփական ընտանիքին։ Խոսելով ապօրինի ծագում ունեցող գույքի բռնագանձման օրենքի վերաբերյալ հայտնի շրջանակների կողմից որպես «օջախ խլելու» օրենքը ներկայացնելու մասին, նկատում է՝ ուրիշի օջախի կրակը մարելու հաշվի ստեղծվածը օջախ չէ։ Համազասպ Դանիելյանի սրտով չէ այն դիտարկումը, թե իշխանությունը դատավորներին հեղափոխական շանս է տալիս։ Նշում է՝ արդարադատության նախարարի ներկայացրած առաջարկները դեռ պետք է քննարկեն, քանի որ, ըստ պատգամավորի, խնդիրներ կան։ Նա անդրադառնում է նաև ընտրական օրենսգրքում լրացումներ և փոփոխություններ կատարելու մասին նախագծի շուրջ աշխատանքներին։
