Եվրասիական տնտեսական բարձրագույն խորհրդի՝ մայիսի 19-ին կայացած տեսակոնֆերանսի ընթացքում հնչել են Հայաստանին ու հայկական շահերին առնչվող հայտարարություններ:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, կառավարման հարցերով փորձագետ Սերոբ Անտինյանը և Հայ կառուցողական կուսակցության ղեկավար Անդրիաս Ղուկասյանը:
Վլադիմիր Պուտինը անդրադարձել է ԵԱՏՄ-ում գազի փոխադրման միասնական սակագին սահմանելու` Հայաստանի և Բելառուսի առաջարկին: «ՌԴ նախագահն ակնհայտորեն մերժել է այդ առաջարկը,- նշեց Հակոբ Բադալյանը՝ հավելելով, որ ՌԴ նախագահի գնահատմամբ՝ ինտեգրացիայի ավելի խոր մակարդակ է անհրաժեշտ դրա համար, բայց դրա տակ նաև քաղաքական պահանջ կա, այսինքն՝ ավելի մեծ ենթակայություն ու հավատարմություն Ռուսաստանին: Վերլուծաբանի գնահատմամբ՝ Ռուսաստանի համար գազը միշտ եղել է ռազմաքաղաքական մահակ: «ՌԴ-ի հետ այս հարցը քննարկելու համար այլընտրանքային տարբերակ է պետք… Ռուսաստանի համար հիմա հոգեվարքային շրջան է աշխարհաքաղաքական առումով: Եվ Լավրովի մուննաթը խոսում էր հենց այդ վիճակի մասին: Հայաստանն ակնկալում է ունենալ գազի գնի նվազում՝ բացի միասնական շուկայի ռազմավարական խնդրից»,- նշեց Հ. Բադալյանը:
«Ռուսաստանը պետք է ցանկացած գործոն օգտագործի իր վիճակը բարելավելու համար, ինչպես նաև էներգակիրներն օգտագործելու՝ որպես քաղաքական գործոն, միշտ է այդպես եղել,- նշեց Սերոբ Անտինյանը:- Դաշնակցային հարաբերությունները կարծես թե երկրորդ պլան են մղվում, և առաջին պլան են գալիս քաղաքական գերիշխանության խնդիրները: Ռուսաստանի այդպիսի արձագանքը սպասելի էր»:
Անդրիաս Ղուկասյանը, անդրադարձ կատարելով ՌԴ հետ հարաբերություններում նախորդ իշխանության վարած քաղաքականությանը, ընդգծեց, որ Սերժ Սարգսյանի բոլոր գործարքները ձախողվել են:
Քննարկման մասնակիցների դիտարկմամբ՝ Մոսկվան Հայաստանում փնտրում է քաղաքական հենարան:
Մանրամասն տեսանյութում:
