Եվրասիական տնտեսական բարձրագույն խորհրդի՝ այսօր կայացած տեսակոնֆերանսի ժամանակ ՀՀ վաչապետ Նիկոլ Փաշինյանն ասել է, որ ԵԱՏՄ-ում գազի ընդհանուր շուկայի ձևավորման անհրաժեշտությունը Հայաստանը առավել սուր է զգում: «Էներգառեսուրսների միասնական շուկայի ձևավորումն անհրաժեշտ է առանց խտրականության, ինտեգրացիան լիարժեք չի լինի, տնտեսական հավասար գործունեություն չի լինի առանց դրա»:
Մոսկվան չի շտապում նվազեցնել գազի գինը: Ինչո՞ւ ՝ Մոսկվան դաշնակից Հայաստանի նկատմամբ խտրական վերաբերմունք ցուցաբերում: Թեմայի շուրջ «Առաջին լրատվական»-ի հետ զրույցում անդրադառնալով այս հարցին՝ քաղաքագետ Ստեփան Գրիգորյանը նշեց. «Նախ՝ ԵԱՏՄ-ն Ռուսաստանի համար տնտեսական ինտեգրացիա չէ, այլ պատրվակ է, որ Ռուսաստանը մեզ նման «անխելք երկրներին» վասալային վիճակում պահի: Սերժ Սարգսյանը իրավունք չուներ առանց հանրաքվեի այդ քայլին գնալ, բայց միանձնյա որոշում ընունեց և մեր երկիրը դարձրեց ԵԱՏՄ անդամ, դա հանցագործություն էր: Դեռ այն ժամանակ ես ասացի, որ ոչինչ չենք ստանա, և միամիտ է մտածել, թե Ռուսաստանն ուզում է շուկայական հարաբերություններ ստեղծել և օգնել տնտեսության զարգացման հարցում: Ռուսաստանին այս կառույցը պետք է, որ մեզ նման երկրներին, որոնք դեռ կայացած և ուժեղ չեն, իրեն մոտ պահի և աշխարհին ցույց տա, թե նախկին Խորհրդային տարածքում ինչ-որ գործընթացներ են ընթանում… Մոսկվայի նպատակը մեզ կախվածության մեջ պահելն է»:
Ստեփան Գրիգորյանի դիտարկմամբ՝ Ռուսաստանը եթե Հայաստանին և Բելառուսին գազը ցածր գնով վաճառի, ապա այս երկրներն ավելի անկախ կլինեն, բայց Ռուսաստանի նպատակը աջակցելը չէ, այլ տիրելն է: Քաղաքագետի կարծիքով՝ պետք է Ռուսաստանի հետ խայտառակ պայմանագրերը վերանայվեն. «Սերժ Սարգսյանը պետք է դատվի Ռուսաստանի հետ խայտառակ երկու պայմանագիր կնքելու պատճառով…»:
Քաղաքագետի գնահատմամբ՝ իշխանությունը Մոսկվային դուր գալու սխալ քաղաքականություն է որդեգրել:
Մանրամասն՝ տեսանյութում: