Հունիսի 14-ին «Առաջին լրատվականի»՝ «Ովքե՞ր են երեխա տղա մարմնավաճառները և որտե՞ղ են իրենց ծառայությունները մատուցում» հրապարակման մեջ մտահոգություն էինք հայտնել, որ Երևանի տղամարդ մարմնավաճառների մի մեծ խումբ իրենց հավաքատեղի են ընտրել Գրիգոր Լուսավորիչ եկեղեցուն հարող այգին:
Ընթերցողների և իրավասու մարմինների ուշադրությունը հրավիրել էինք այն հանգամանքի վրա, որ մարմնավաճառների տարիքը սկսում է 10 տարեկանից: Ընդ որում ՝ խմբում ընդգրկված երեխաները կոնկրետ այս այգում շահագործվում են տարբեր ուղղություններով. մի մասը առավոտյան ծաղիկներ, նկարներ է վաճառում, իսկ գիշերային ժամերին արդեն ուղղորդվում մարմնավաճառության: Ի դեպ, այս մտահոգությունը մեզ հետ զրույցում հրապարակման մեջ կիսել էին նաև այգու աշխատակիցները և առևտրականները: Ինչևէ, հրապարակմանը արագ արձագանքեցին թե՛ իրավասու մարմինները, թե՛ հ/կ-ները և խոստացան ամեն ինչ անել, որ մեղավորները պատժվեն՝ եթե իհարկե նման բան կա: Անցած 1.5 ամիսների ընթացքում, սակայն, ոստիկանությունը և հ/կ-ներն այս ուղղությամբ ոչ առանձին հայտարարությամբ հանդես եկան, ոչ էլ որևէ պարզաբանում տվեցին: Հետևաբար երեկ կրկին ուսումնասիրություն կատարեցինք այգու տարածքում՝ պարզելու համար իրավիճակը փոխվե՞լ է, թե՞ ոչ:
Մեր հարցուփորձը նախ սկսեցինք այգուն հարակից շենքերի բնակիչներից՝ ճշտելու համար, թե բնակիչները գիշերային ժամերին այգում որևէ արտասովոր երևույթ նկատե՞լ են: Բնակիչների մի մասը հրաժարվեց այդ թեմայով խոսել՝ պատճառաբանելով, որ իրենք ծանոթ են այդ լուրերին, սակայն չեն ցանկանա որևէ բան ասել: Բարեբախտաբար, վախվորած բնակիչների շարքերում գտնվեցին այնպիսիք, ովքեր ոչ միայն կիսվեցին իրենց տեսածով և մտահոգություններով, այլև ցանկացան, որ իրենց վկայությունները օգնեն, որպեսզի հնարավոր լինի այդ երեխաներին փրկել շահագործումից: Ամեն դեպքում նրանք չցանկացան ներկայանալ: Նրանց պատմելով, դեռևս 1.5 ամիս առաջ իրենք չէին կարողանում քնել, քանի որ գիշերը 2-ից հետո այգուց թե՛ տարեցների, թե՛ երեխաների լացի, տարօրինակ ծիծաղի, զվարճանքի ձայներ են լսվել: Այդ ամենը հաճախ զուգորդվել է նաև վիճաբանություններով: Այգում այդ ժամերին տարեցների առկայությունը, շենքերի բնակիչների խոսքերով, դեռևս հասկանալի է, սակայն նրանք մինչ օրս չեն հասկանում, թե ինչու են այդ ժամերին երեխաները գտնվել այգում: Նրանց տարօրինակ է թվացել նաև այն հանգամանքը, որ այդ աղմուկը մշտապես սկսվել է իրենց զբոսանքից հետո: Նշենք, որ մեր զրուցակիցների փոխանցմամբ՝ հարակից շենքերի բնակիչները, քանի որ ամռանը տառապում են անքնությամբ, գիշերը մինչև ժամը 1-1.30-ը զբոսնում են այգու տարածքում, որից հետո, երբ այգին դատարկվում է, նոր միայն նման տարօրինակ աղմուկ ու ձայներ են հնչում:
Հատկանշական է այն հանգամանքը, որ, ինչպես հավաստեցին մեր զրուցակիցները, վերջին 1.5 ամիսների ընթացքում այլևս նման տարօրինակ ձայներ չեն լսում: Երևույթը թեև իրենց համար հաճելի է, բայց միևնույն ժամանակ՝ տարօրինակ, քանի որ մշտապես ուղեկցող աղմուկը հանկարծակի վերացել է: Նրանք կարծում են, որ դա ամենայն հավանականությամբ պայմանավորված է վերը նշված կասկածներով և դրանց շուրջ բարձրացված աղմուկով: Այգու հարևանությամբ գործող տաքսիստները հրաժարվեցին այդ թեմայով խոսել, նրանցից միայն մեկը ընդամենը ասաց, որ բարեբախտաբար, այն, ինչ մի քանի ամիս առաջ իր աչքը տեսնում էր՝ այսօր արդեն չկա: Իսկ տարածքի առևտրականները նշեցին, որ վերջին շաբաթների ընթացքում այգու տարածքում ծաղիկ, նկարներ վաճառող երեխաներ այլևս չկան: Իհարկե, երևույթն ուրախացնում է, բայց տեղին է կիսել այն մտահոգությունը, որ եթե նրանք հրաժարվել են այս վայրից, ապա մեկ այլ վայր կգտնեն, հատկապես այն դեպքում, երբ նման խմբավորումներն ունեն լուրջ ղեկավար:
Նախորդ այցելության ընթացքում այգու տարածքում, ինչպես տեղեկացրել էինք, րոպեներ անց հայտնվեցինք մի խումբ երիտասարդների վերահսկողության տակ, որոնք տարբեր կողմից մեզ հետևում էին՝ «ուղեկցելով» մինչև աշխատավայր: Երբ նրանցից ոմանց տարբեր վայրերում հարցնում էինք՝ ի՞նչ խնդիր կա, պատասխանում էին, թե ցանկանում են ծանոթանալ: Իսկ վերջում մեկը, հավանաբար իրենց հանդեպ կասկածը ցրելու համար, նշեց, թե մեզ անհանգստացնող տղաները քաղաքացիական հագուստով ոստիկաններ են: Այս անգամ, թեև մենք միայնակ չէինք, սակայն մեզ ակնհայտ հետևողներ և անհանգստացնողներ չկային: Ի դեպ, այգու մշտական այցելուները նշեցին, որ տարածքը շատ լավ վերահսկվում է ոստիկանների կողմից, սակայն նրանք օպերատիվ արձագանքում են աղջիկների և տղաների ցերեկային սիլի-բիլիներին, կռիվներին, իրենց փողն առնում ու մի կողմ են քաշվում: Իսկ գիշերային հերթապահությունը այդ ուշադրությունը չի դրսևորում:
Ամեն դեպքում այս խնդիրը շարունակում է մեր ուշադրության կենտրոնում մնալ և նոր մանրամասների դեպքում հավելյալ կտեղեկացնենք:
