«Առաջին լրատվական»-ի զրուցակիցն է ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:
– Անդրադառնանք ներքաղաքական գործընթացներին: Ներքաղաքական լարումներին, կարծեք թե, իշխանական կողմը կա՛մ չի հակազդում, կա՛մ թույլ է հակազդում, այդպիսի տպավություն կա: Ի՞նչն է պատճառը:
– Իշխանությունը շարժվում է իր հաստատած օրակարգով, կան ուժեր, որոնց համար պետական օրակարգը նշանակություն չունի, իշխանությունը եկել է իշխանության լեգիտիմ ճանապարհով և հայտարարել է իր ծրագիրը, և այդ օրակարգը սպասարկելու համար սկսել է ամբողջ ծավալով աշխատանքը՝ գործադիր, օրենսդիր և հիմա դատական համակարգի բարեփոխումների փուլին ենք մոտենում և այլն, դրանք բոլորը փոխկապակցված են, բայց կան ուժեր, որոնք մերժված լինելով, իշխանությունը կորցնելուց հետո այլ նպատակ, քան գործող իշխանությունների ռեսուրսը մաշեցնել, իրենց առջև չեն դրել: Նրանք նպատակ չունեն քաղաքական պայքարի միջոցով պատրաստվել հաջորդ ընտրություններին, քանի որ բնազդով շատ լավ հասկանում են, որ հաջորդ ընտրություններում էլ են մերժված լինելու:
Նրանց մերժված լինելը խորքային պատճառներ ուներ, և 2018թ. հեղափոխությունը սովորական, մակերեսային փոփոխություն չէր, այլ հեղափոխական փոփոխություն, որի անհրաժեշտությունը ձևավորվել էր տասնյակ տարիների ընթացքում… Նախկին ուժերը ունենալով հսկայական ռեսուրսներ, ֆինանսներ՝ ունեն նաև իշխանության ամենաթողության նկատմամբ մեծ կարոտախտ. իշխանությունը որևէ պատասխանատվություն չի ունեցել պետական շահի առումով, պատասխանատվություն է կրել իրեն սպասարկող տարբեր խմբերի համար, նրանք մասնակից են եղել ամեն ինչին՝ կոռուպցիային, քաղաքական ընտրությունների կեղծման գործընթացներին, ամեն ինչին, լիցենզիա են ունեցել անհատներ, տարբեր փոքր խմբեր, որոնք իշխանական կերակրատաշտից օգտվելու անսահմանափակ հնարավորություն են ունեցել:
Հիմա բազմաթիվ քրեական գործեր են հարուցվել, օրինակ՝ փախածներ կան՝ հարուցված քրեական գործի շրջանակում ՀՀ տարածքը լքած անձինք, որոնք թե՛ հանցավոր աշխարհի հետ առնչություն ունեցողներ են, թե՛ պետական պաշտոնյաներ, բայց նրանց զգալի մասը՝ 90 տոկոսը, լինելով քաղաքական դաշտից դուրս մարդիկ, դարձել էին քաղաքական իշխանության կրողներ, հայտնվել խորհրդարանում:
– Ձեր նշած անձինք կամ ուժերը, անգամ շատը դրսից է արվում, կոնկրետ մեղադրանքներ են հնչեցնում նոր իշխանությունների հասցեին՝ ծխախոտի գործ, ադամանդի գործ… Երբ նշեցի, որ իշխանությունը չի արձագանքում կամ չի հակազդում, խոսքս նաև այս մեղադրանքներին էր վերաբերում:
– Մեր համազգային փեսայի վերջին «հայտնության» ժամանակ նա ինչ-որ սխեմաներ էր ներկայացնում, և այնպիսի տպավորություն էր, որ դրանք նախկինում օգտագործված սխեմաներ են, որոնց արդյունքում իշխանություն կրող խմբեր են հարստացել: Ես պատրաստվում եմ լսել նաև նրա հաջորդ՝ չորրորդ, հինգերորդ «հայտնությունները»:
– Ինչո՞ւ եք վստահ, որ լինելու են չորրորդ-հինգերորդը:
– Եթե չլինեն, ուրեմն նրան իրավապահ մարմինները հայտնաբերել են, և նա կանգնել է արդարադատության առաջ, քանի դեռ հայտնաբերված չէ Միքայել Մինասյանը, շարունակելու է խոհանոցից մեզ զբաղեցնել իր «բացահայտումներով»: Իսկ այդ «բացահայտումները» հին մեխանիզմներ են, որոնք նա ներկայացնում է նոր լույսով՝ այդ ամեն ինչը պտտեցնելով նոր իշխանության վրա:
– Կոնկրետ բաներ են ասում այդ թևից, պարո՛ն Քոչարյան, ինչո՞ւ չեք արձագանքում:
– Ես արձագանքել եմ: ԱԺ ճեպազրույցի ժամանակ երբ ինձ հարց տվեց «Հինգերորդ ալիքի» լրագրողը՝ ասելով, որ դա ազգային անվտանգության խնդիր է, ես պատասխանեցի, որ համաձայն եմ մի տեսակետից, որ Միքայել Մինասյանի մեդիա համակարգը դարձել է մեր երկրի անվտանգության համար սպառնալիք, դա ակնհայտ է, որովհետև մեր երկիրը հայտնվել է լայնածավալ սադրանքների տիրույթում, և պետք է այդ սադրանքները կամաց-կամաց կամ միանգամից չեզոքացնել… Ամեն մեկը, ըստ իր թույլ տված սխալների, պետք է ստանա հակազդում: Պետք է ստանան ճիշտ պատասխաններ, որպեսզի հնարավոր լինի իրենց լռեցնել…
– Մի քանի օր առաջ դատարանը մերժեց Ռ. Քոչարյանի խափանման միջոցը փոխելու հերթական միջնորդությունը: Ինչ եք կարծում՝ դրանից հետո սպասե՞լ բուն դատաքննության մեկնարկին:
– Ո՛չ, Ռոբերտ Քոչարյանը և իր պաշտպանական թիմը նպատակ չունեն դատաքննության պրոցեսի միջոցով մտնել պայքարի մեջ, որովհետև շատ լավ գիտեն 800 վկայությունների արժեքը: Շատերը երբ որ խոսում են Միքայել Մինասյանի «կայսրության» հեռուստաալիքներով, ասում են, որ իշխանությունները չեն ուզում, որ դատաքննությունն սկսվի: Դատաքննությունը պետք է ցանկանա Ռ. Քոչարյանը և իր մեծածավալ պաշտպանական թիմը, որն ամեն մի դատական նիստից առաջ ներկայացնում է տասնյակ միջնորդություններ, որոնք վերաբերում են մեկ թեմայի՝ խափանման միջոցը փոխելուն… Եղբա՛յր, մի օր սկսեք այդ դատաքննությունը, և ապացուցեք, որ իշխանությունները սխալ են մեղադրել Քոչարյանին, և որ նրա այդ ժամանակվա որոշումները աղետալի չեն եղել և չեն բերել առնվազն 10 մարդու սպանության: Ընդհանրապես ամբողջ պետական մեքենան, իշխանություններին ներքաշել կեղծիքի՞ մեջ, ինչքա՞ն կարելի է, վերջիվերջո այդ կեղծիքները տեսել են բոլորը՝ տարիներ շարունակ, և դա բերել է նրան, որ Հայաստանում տեղի է ունեցել քաղաքական համակարգի փոփոխություն:
– ԱԺ-ն քննարկում է Սահմանադրական դատարանի կնճիռը լուծելու այլ տարբերակներ:
– Կարծում եմ՝ բոլոր տարբերակների մասին խոսել է նաև վարչապետը, երբ խոսվեց, որ արտակարգ դրության ռեժիմը պետք է երկարաձգվի… Անթույլատրելի է սպասել, թե երբ կավարտվի կորոնավիրուսի գրոհը, հետո նոր մեր երկրում դատաիրավական համակարգի բարեփոխումներին անցնել հանրաքվեի միջոցով, պետք է օգտվել թե՛ Սահմանադրության, թե՛ մեր օրենքների ընձեռած այլ հնարավորություններից, այդ ուղղությամբ իրավաբաններն աշխատում են, մենք մոտ ենք այդ խնդրի լուծմանը:
Հարցազրույցն ամբողջությամբ՝ տեսանյութում:
