Ես իմ գնահատականները ՄԻՊ-ի գրասենյակի աշխատանքի հետ կապված արդեն հնչեցրել են, և ուզում եմ նշել, որ ՄԻ պաշտպանի հետ կապված որևէ անձնական խնդիր ես չունեմ, իմ հայտարարությունները դրանից կախված չեն եղել: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Վաղարշակ Հակոբյանը՝ անդրադառնալով Արման Թաթոյանին ուղղված իր քննադատությանը և վերջինիս կոշտ արձագանքին:
«Դա եղել է քաղաքական հայտարարություն, եղել է գնահատական: Իմ պատկերացումները ես կիսել եմ հանրության հետ և որևէ մեկին վիրավորելու միտում չեմ ունեցել»,-ասաց նա:
Հարցին, թե ինչպես է գնահատում ՄԻ պաշտպան Արման Թաթոյանի արձագանքը, թե մյուս անգամ չհամարձակվեք ձեր ձայնը բարձրացրել ու սպառնալ ՄԻՊ-ին, «Իմ քայլի» պատգամավորն ասաց. «Ես կարծում եմ՝ դրանք էմոցիոնալ հայտարարություններ էին, պահի ազդեցության տակ: Միգուցե մենք իրար ճիշտ չենք հասկացել, ես որևէ մեկի վրա մատ չեմ թափ տվել, որևէ մեկի հետ իշխանական դիրքերից չեմ խոսել»:
