Ադրբեջանի պետական անվտանգության ծառայությունը Թուրքիայում ձերբակալել և Բաքու է տեղափոխել ահաբեկչական խմբավորման անդամ Սալեհ Ադիլովին, որը զորամասի վրա հարձակման մասնակից է եղել:
«Վան քաղաքում Ադրբեջանի պետական անվտանգության ծառայության և Թուրքիայի հատուկ ծառայությունների համատեղ գործողությունների արդյունքում բերման է ենթարկվել եւ Ադրբեջան է տեղափոխվել 1984 թ. ծնված Ադիլով Սալեհ Վալեհ օղլուն, որը հետախուզվում էր Պետական անվտանգության ծառայության կողմից քննվող գործի շրջանակներում»,-ասվում է մամուլի ծառայության հաղորդագրության մեջ:
Գործակալության տվյալներով՝ Ադիլովը, արմատական կրոնական խմբավորման մյուս անդամների հետ միասին, 2008-ին զինված հարձակում էր կազմակերպել Թարթառի շրջանում տեղակայված զորամասի մարտական հենակետի վրա, որի արդյունքում մեկ զինծառայող զոհվել է, իսկ մյուսը՝ ծանր վիրավորվել: Դեպքի վայրից գողացել են նաեւ զենք եւ զինամթերք:
«Սալեխ Ադիլովը 2009 թ.-ի մայիսի 14-ին, ապօրինի զինված խմբավորումներին միանալու համար, Ադրբեջանից տեղափոխվել է Իրան, իսկ այնտեղից՝ Պակիստան: Այնտեղ նա միացել է Վուգար Հաջիզադեի ղեկավարած ահաբեկչական խմբավորմանը, որը գործում է «Թալիբան» ահաբեկչական կազմակերպության հովանավորչությամբ:
Այն բանից հետո, երբ հակաահաբեկչական կոալիցիայի ուժերը ոչնչացրել են Հաջիզադեին, ահաբեկչական խմբավորումը ղեկավարում էր Ադիլովը:
«2014-ին «Թալիբան» ահաբեկչական կազմակերպության միջնորդությամբ նա գաղտնի մուտք է գործել Թուրքիա, բայց երբ նա փորձել է տեղափոխվել Սիրիա, նրան ձերբակալել են Իրանի իրավապահ մարմինները: 2019-ին ազատ արձակվելուց հետո, Սալեհ Ադիլովը կրկին ապօրինի կերպով տեղափոխվել է Թուրքիա և այնտեղ թաքնվել:
Ձերբակալված Սալեխ Ադիլովի քրեական գործի քննությունը շարունակվում է», – ասվում է գործակալության հաղորդագրության մեջ: