Կառավարության հաստատած՝ կորոնավիրուսի տնտեսական հետևանքների չեզոքացման 17-րդ ծրագրի շահառուները բարձր տեխնոլոգիաների ոլորտի տնտեսվարողներն են: Բարձր տեխնոլոգիական արդյունաբերության նախարար Հակոբ Արշակյանն «Առաջին լրատվական»-ի հետ զրույցում նշեց, որ ամբողջական պատկերացում կազելու համար, թե ինչպես է ազդել կորոնավիրուսը տեխնոլոգիական ոլորտի ընկերությունների վրա հարցաշար է կազմվել և ուղարկվել ոլորտի ասոցիացիաներին ու ընկերություններին.«Հավաքագրել ենք շուրջ 185 ընկերության պատասխանները: Պարզվեց, որ ոլորտում ընկերությունների շուրջ 60 տոկոսի մոտ բացասական հետևանք է գրանցվել, 30-ի մոտ չեզոք, իսկ 8 տոկոսի մոտ՝ դրական»:
«Մեր ծրագիրը երեք հիմնական ուղղություն ունի,- նշեց նախարարը,- նորարարական դրամաշնորհներ՝ նոր ընկերությունների համար՝ առավելագույն շեմը 10 միլիոն դրամ, դրամաշնորհներ կայացած ընկերությունների համար՝ առավելագույնը 20 միլիոն դրամ: Կառավարությունում ջենտլմենական պայմանավորվածություն ունենք, որ եթե լավ արտադրանք առաջարկող ընկերությունները շատ լինեն, միևնույն է, կֆինանսավորենք: Սա միաժամանակ օգնության և զարգացման ծրագիր է: Եվ երրորդ ուղղությունը՝ բիզնես ծրագրում ներդրումներ ներգրավող ընկերություններին համաֆինանսավորմամբ աջակցել մինչև 30 միլիոն դրամով»:
Վարչապետ Նիկոլ Փաշինյանի խոսքով՝ ռազմարդյունաբերությունը պետք է լինի մեր տնտեսության քարշակող ուժերից մեկը: Անդրադառնալով այս դիտարկմանը՝ Հակոբ Արշակյանն ընդգծեց. «Նկատի ունենք այն, որ պետք է ավելի շատ հենվել ներքին արտադրողի վրա, և երկրորդ՝ պետք է կարողանանք դեպի արտաքին շուկա դուրս գալու ստրատեգիական ուղղություններով ճանապարհներ գտնել… Պաշտպանության նախարարության հետ արդեն համագործակցության ինստիտուտներ են կայանում»:
Մանրամասն՝ տեսանյութում: