Հայաստանի Բարձրագույն խմբի առաջնությունը կվերսկսվի մայիսի 23-ին, իսկ Առաջին խմբի առաջնությունը՝ մայիսի 30-ին:Այս մասին որոշումներն ընդունվել են ՀՖՖ գործադիր կոմիտեի երեկ կայացած նիստի ընթացքում: Ինչպես Բարձրագույն, այնպես էլ Առաջին խմբերի՝ վերսկսումից հետո կայանալիք առաջին տուրի հանդիպումները կանցկացվեն առանց հանդիսականների: Հետագայում, հաշվի առնելով հանրապետությունում կորոնավիրուսի համաճարակի դրսևորումները և ՀՀ կառավարության կայացրած որոշումները, կքննարկվեն վերոնշյալ սահմանափակումը ուժի մեջ թողելու կամ վերացնելու տարբերակները:
Ու փաստորեն, Հայաստանը պաշտոնապես դարձավ երկրորդ երկիրը, որտեղ համավարակի հետևանքով առաջացած սահմանափակումներից հետո վերսկսվում է ֆուտբոլի առաջնությունը։ ՀՖՖ Գործկոմը կայացրեց ևս մի քանի որոշում: Մասնավորապես, որոշվել է հունիսի 1-ից վերափոխված խաղացանկով վերսկսել նաև ՀՀ ֆուտզալի սուպերլիգայի մրցաշարը: Հունիսի 1-ին կմեկնարկի նաև Ֆուտզալ լիգայի գավաթի խաղարկությունը: Սա միանգամայն պատասխանատու քայլ է աշխարհում ամենամասսայական մարզաձևի վերակենդանացման գործում։ Արդեն այսօր «Բորուսիա»-«Շալկե» մրցավեճով կվերսկսվի ֆուտբոլի Գերմանիայի առաջնությունը, որը համավարակի պատճառով դադարեցվել էր մարտի 13-ին։
Գերմանիան առաջին երկիրն է, որը ձեռնոց նետելով կորոնավիրուսին՝ կարևոր քայլ է կատարում մեծ ֆուտբոլը վերակենդանացնելու գործում։ Գերմանիայի կանցլեր Անգելա Մերկելն անձամբ էր անդրադարձել ֆուտբոլի խնդրին՝ հայտարարելով, որ կառավարության հատուկ որոշման համաձայն՝ Բունդեսլիգան կվերսկսվի մայիսի 15-ից: Խաղերը կանցնեն առանց հանդիսականների, ակումբներից յուրաքանչյուրից մարզադաշտում կլինի 126 անձ, այդ թվում՝ ֆուտբոլիստները: Իսկ լրագրողներից տրիբունաներում կլինի միայն 30 ներկայացուցիչ: Նշենք, որ Գերմանիայում մինչև սեպտեմբերի 1-ը արգելվել են բոլոր զանգվածային միջոցառումները, սակայն ֆուտբոլի համար պետական մակարդակով ըստ էության ընդունվել է բացառիկ որոշում։ Իսկ որ երկրները կհաջորդեն Գերմանիային ֆուտբոլը վերակենդանացնելու գործընթացում։ Երեկ հայտնի դարձավ, որ Իտալիայի, Անգլիայի և Իսպանիայի առաջնությունները վերսկսվելու են հունիսի 12-ին։
Այս երկրներում ևս ֆուտբոլի մասով որոշումներ է ընդունվել պետական մակարդակով։ Նշենք, որ պաշտոնապես արդեն 3 երկիր՝ Հոլանդիան, Բելգիան և Ֆրանսիան, որոշում են կայացրել ազգային առաջնությունները չեղարկելու և անավարտ թողնելու մասին։ Սպասվում էր, որ մայիսի 15-ին առաջնությունն անավարտ թողնելու վերաբերյալ որոշում կկայացվի նաև Ռուսաստանում։ Վերջին պահին սակայն Ռուսաստանի ֆուտբոլի միությունը ետ կանգնեց այդ մտադրությունից։ Մասնավորապես ՌԴ կառավարության հետ քննարկումից հետո երեկ որոշվեց, որ Ռուսաստանի Պրեմիեր լիգան կվերսկսվի հունիսի 21-ին։ Միևնույն ժամանակ որոշվել է Ռուսաստանի առաջին և երկրորդ դիվիզիոնների մրցաշարը անավարտ թողնելու մասին։ Պրեմիեր անավարտ թողնելու մտադրությունը զայրույթի ալիք էր բարձրացրել ռուսական ակումբների շրջանում։ Խաղացված 22-րդ տուրից հետո 50 միավորով առաջին հորիզոնականում է Սանկտ Պետերբուրգի «Զենիթը»։ Երկրորդ հորիզոնականում 41 միավորով Մոսկվայի «Լոկոմոտիվն» է, իսկ մոսկովյան մեկ այլ ակումբ՝ ԲԿՄԱ-ն, նույնքան միավորով եզրափակում է լավագույն եռյակը։ Խոսվում էր, որ մայիսի 15-ին պաշտոնապես պետք է հայտարարվի «Զենիթի»՝ Ռուսաստանի չեմպիոն դառնալու մասին։
Մոսկովյան թիմերի երկրպագուները համարում էին, որ ՌԴ կառավարությունն ու ֆուտբոլային միությունը ուղղակի ոչնչացնում են ֆուտբոլը։ Երկրպագուները շարունակ օրինակ են բերում հարևան Բելառուսը, որտեղ համավարակի պայմաններում առաջնությունն ընթանում է բնականոն հունով։
