Մարտի 1-ի զոհերի հարազատները հույս չունեն, որ դատարանի կողմից Քոչարյանի խափանման միջոցի փոփոխության հերթական միջնորդության մերժումից հետո դատավարությունը, ի վերջո, կսկսվի ու կընթանա բնականոն հունով։
Զոհերից Գոռ Քլոյանի հայրը՝ Սարգիս Քլոյանն «Առաջին լրատվական»-ի հետ զրույցում ասաց, որ դատաքննությունը չի սկսվելու մինչև չլինի Սահմանադրական դատարանի որոշումը։ «Իրենք շարունակելու են ձգձգել նիստերը։ Այս միջնորդությունը մերժեցին, իրենք ուրիշ պատճառ էլ գտան. Քոչարյանին վիրահատել են, մի մասն էլ հետվիրահատական վիճակում կպարկի հիվանդանոցում։ Մի ամիս հետո նորից անվստահություն կհայտնեն դատավորին, ապա խափանման միջոցի փոփոխության միջնորդություն կներկայացնեն, հետո նոր երաշխավորներ կգտնեն, և այսպես շարունակ՝ մինչև չլինի Սահմանադրական դատարանի որոշումը։ Իրենց միակ հույսը ՍԴ որոշումն է»,- ասաց Քլոյանը՝ հավելելով, որ ստեղծված իրավիճակից ակնհայտ է դառնում, որ իշխանությունը պետք է քայլեր ձեռնարկի և, ի վերջո, լուծի Սահմանադրական դատարանի հարցը։ «Հասկանում եք, Սահմանադրական դատարանի հարցը լուծելը միակ միջոցն է, որ Մարտի 1-ի գործով դատաքննությունը, ի վերջո, սկսվի ու ընթանա։ Սահմանադրական դատարանում կա ճգնաժամ։ Կորոնավիրուսը թույլ չի տալու, որ այդ ճգնաժամը լուծվի հանրաքվեի ճանապարհով, հետևաբար՝ քաղաքական իշխանությունը, Ազգային ժողովը պետք է այլ լուծում քննարկեն ու իրականացնեն։ Ավելորդ ժամանակ չպետք է կորցնել։ Սահմանադրական դատարանի հարցը պետք է քննարկվի ու լուծվի խորհրդարանում, ուրիշ տարբերակ չկա»,- ասաց Քլոյանը։
Նրա խոսքերով՝ քանի դեռ ՍԴ-ի հարցն էլ լուծված չէ, հարկավոր է ինչ-որ այլ միջոցներ ձեռնարկել, որ դատական նիստը այս բուֆերային վիճակից դուրս գա, ու նիստերը կայանան։ «Հակառակ դեպքում այլևս այսպես հնարավոր չէ։ Սկավառակը անընդհատ պտտվում է՝ խափանման միջոց, գրավի միջնորդություն, անվստահություն դատավորին, երաշխավորներ, և այսպես արդեն քանիերորդ անգամ»,- եզրափակեց Քլոյանը։
Մարտի 1-ի գործով տուժողների իրավահաջորդների ներկայացուցիչ Մարինա Պողոսյանը ևս օրերս մեզ հետ զրույցում ասել էր, որ Քոչարյանն ու իր փաստաբանական թիմը ջանք ու եռանդ չեն խնայում ձգձգելու դատավարությունը, մինչև կայացվի ՍԴ որոշումը։ Իսկ այն, որ ՍԴ-ից իսկապես կարող է վտանգավոր որոշում լինել, միանշանակ է։ Հետևաբար՝ Սահմանադրական դատարանի ճգնաժամի լուծումը այս իշխանության համար պետք է առաջնային լինի։
Հիշեցնենք, որ Քոչարյանի փաստաբանական թիմը Սահմանադրական դատարանում վիճարկում է 300.1 հոդվածի սահմանադրականության հարցը, որը վերաբերում է Քոչարյանի անձեռնմխելիությանը։ Այդ հարցով Սահմանադրական դատարանը դիմել էր ՄԻԵԴ և Վենետիկի հանձնաժողով, այդ կառույցներից ակնկալելով խորհրդատվական կարծիք։ Ակնկալվում է, որ հունիս ամսին կլինի այս խորհրդատվական կարծիքը, և Սահմանադրական դատարանը, ի վերջո, որոշում կկայացնի։