«Ես գտնում եմ, որ պետական սահմանադրական մարմինները իրենց լիազորությունների շրջանակներում իրենք պետք է որոշումներ կայացնեն, որպեսզի մեր հանրային ռեսուրսը խնայվի։ Տվյալ դեպքում ես վստահ եմ, որ ԲԴԽ-ն ինքը պետք է այս հարցին լուծում տար և շարունակեր վարույթը, որովհետև այս նիստի կասեցումը և հարցի ուղարկումը Սահմանադրական դատարան, ըստ իս՝ արդարացված չէ։ Դրանով ԲԴԽ-ն, կարծես թե, պատասխանատվություն չի ստանձնում որոշում կայացնելու, թե ինչպես պետք է նա կիրառի Դատական օրենսգիրքը, որը ԲԴԽ-ի կողմից կիրառվող առաջնային օրենքն է»,- «Առաջին լրատվական»-ի հետ զրույցում ասաց ԲԴԽ անդամ Հայկ Հովհաննիսյանը։
Նա նաև հավելեց․ «Այս ամենի մյուս բացասական արդյունքն այն է, որ, տեսեք՝ իրականում մենք ինչ իրավիճակ ունենք։ Ես ինքս հատուկ կարծիք եմ գրել, որում բարձրաձայնել ու քննադատել եմ Սահմանադրական դատարանին, նրա կազմին և նրա կողմից կայացված որոշումը։ Սահմանադրական դատարանը պետք է որոշի մի հարց, որն ուղղակիորեն ինձ է վերաբերում։ Տվյալ դեպքում, եթե Սահմանադրական դատարանն առաջնորդվի բարեվարքության կանոններով, ուրեմն պետք է ինքնաբացարկ հայտնի և այդ գործը չքննի։ Եվ այստեղ ստացվում է մի իրավական կազուս։ Բայց ես կարծում եմ, որ այդ կազուսը կարելի էր հանգիստ հաղթահարել՝ իրավական որևէ խնդիր չկար․ ԲԴԽ նիստն արդեն նշանակված էր, որոշումն կայացված էր։ Եվ այս փուլում անդրադառնալ այսպիսի մի հարցի, կարծում եմ՝ արդարադատության տնտեսման սկզբունքի առումով արդարացված չի»։
Մանրամասները՝ տեսանյութում։
