Արտասահմանից Հայաստան ուղարկվող գումարների կամ, այլ կերպ ասած, տրանսֆերտների նվազումը կարող է հանգեցնել աղքատության մակարդակի բարձրացման, գործազրկության թվի աճին, քաղաքացիների կենսամակարդակի նվազման, ներքին շուկայում առևտրաշրջանառության ծավալների նվազման։ Այդ մասին «Առաջին լրատվական»-ի հետ զրույցում ասաց տնտեսագետ Մովսես Արիստակեսյանը։ Առաջին եռամսյակի տվյալներով՝ ֆիզիկական անձինք բանկերի միջոցով արտասահմանից Հայաստան են ուղարկել մոտ 354 մլն դոլարին համարժեք գումար: Նախորդ տարվա նույն եռամսյակի համեմատ այս գումարը կրճատվել է մոտ 38 մլն դոլարով կամ 9.7%-ով:
«Տրանսֆերտները դեռ կշարունակեն պակասել։ Քանի որ դրանց մեծ մասն ուղարկում են Ռուսաստանից, իսկ Ռուսաստանի տնտեսությունը պարզապես ռեցեսիայի մեջ է ու անկման է գնում։ Այն աշխատատեղերը, որոնք կային ու մեր հայրենակիցները աշխատում էին, արդեն չեն կարող լինել։ Այնտեղի բիզնեսները նույնպես չեն աշխատում, և, հետևաբար, տրանսֆերտները կկրճատվեն։ Տխուր հետևանքներ են սպասվում»,- նշեց տնտեսագետը։
Արիստակեսյանի խոսքերով՝ պետությունն օր առաջ պետք է մտածի արդյունաբերական այնպիսի արտադրություններ ստեղծելու ու զարգացնելու ուղղությամբ, որտեղ ՌԴ չմեկնած աշխատուժը կկարողանա ներգրավվել։ «Մենք արտակարգ դրության մեջ ենք, ու լոկոմոտիվն ու շարժիչ ուժը պետք է լինի պետությունը։ Այնպիսի աշխատատեղեր, գործարաններ պետք է ստեղծվեն, որը հիմնված կլինի երկրի ներքին ռեսուրսների օգտագործման վրա։ Մարդիկ կաշխատեն ու էլ չեն գնա արտագնա աշխատանքի ու չեն սպասի տրանսֆերտների»,- տեսակետ հայտնեց տնտեսագետը։
Արիստակեսյանը, խոսելով տնտեսական կանխատեսումների մասին, նշեց՝ տարվա արդյունքներով տնտեսական անկում կլինի։ «Մենք չենք կարող մնացած եռամսյակներում ստեղծել այնպիսի տնտեսական աճ, քանի որ երկիրը չունի զարգացման ռազմավարական ծրագիր։ Հույսները դրել են մասնավորի վրա, թե ինչպես կզարգացնի տնտեսությունը։
Չկա պետական այնպիսի ձեռնարկություն, որն աշխատատեղեր կունենա ու արտադրանք կտա։ Հույսները դրել են բանկերի կողմից վարկերի տրամադրման վրա։ Բայց մասնավորները չեն ցանկանում վարկեր վերցնել, արտադրանքի իրացման խնդիր կա։ Պետությունն իր ձեռքը պետք է վերցնի զսպանակը։ Մենք այս ծրագրերով աղքատների նոր բեռ ենք ավելացնում։ Չի կարելի»,- ասաց տնտեսագետ Մովսես Արիստակեսյանը։