Amnesty International իրավապաշտպան կազմակերպությունը Սիրիայի իշխանություններին և նրանց աջակցող Ռուսաստանին մեղադրել է Սիրիայի հյուսիս-արևմուտքում մարդասիրական օբյեկտներին ավիահարվածներ հասցնելու մեջ, և հայտարարել, որ դրանք կարող են դիտվել որպես պատերազմական հանցագործություններ:
Նախօրեին հրապարակված Amnesty International-ի միջազգային զեկույցում խոսվում է Իդլիբում 2019 թ.-ի մայիսից մինչև 2020-ի փետրվարը հրետանային և օդային հարվածների 18 փաստագրված դեպքերի մասին:
Նշվում է, որ ռմբակոծությունների հետևանքով ավերվել են դպրոցներ ու բժշկական հաստատություններ: Զեկույցում դիտարկված 18 դեպքերից առնվազն յոթը ռուսական ավիացիայի գործողությունների հետևանք են: Նման օրինակ է 2020 թ.-ի հունվարին Արիխա քաղաքում հիվանդանոցի ռմբակոծումը, որի հետևանքով 11 մարդ է զոհվել:
Քաղաքացիական օբյեկտների վրա բազմաթիվ հարձակումների և խաղաղ բնակչության շրջանում զոհերի մասին հաղորդում են Իդլիբում աշխատող լրագրողները և «Սպիտակ սաղավարտներ» կազմակերպության ներկայացուցիչները: Ռուսաստանի ԱԳՆ-ն և ՊՆ-ն հերքում են քաղաքացիական օբյեկտները թիրախավորելու մեղադրանքները, իսկ «Սպիտակ սաղավարտներ»-ին մեղադրում են ահաբեկիչների հետ համագործակցելու մեջ: