Նոյեմբերի 25-ը բռնության դեմ պայքարի օրն է: Այդ կապակցությամբ «Արմատ» ակումբը ասուլիս էր կազմակերպել և հրավիրել «Կանանց ռեսուրս» կենտրոնի համահիմնադիր, սոցիոլոգ Գոհար Շահնազարյանին, նույն կենտրոնի` սեռական բռնության դեմ պայքարի ծրագրի համակարգող Տաթևիկ Աղաբեկյանին և Մանկավարժական համալսարանի հոգեբանական ծառայությունների կենտրոնի տնօրեն, հոգեբան Մարիամ Մեհրաբյանին:
Հոգեբան Մարիամ Մեհրաբյանը խոսեց բռնության հոգեբանական արմատների մասին, թե ովքեր են հիմնականում դառնում բռնության զոհ, և ինչու բռնությունն այդքան տեղ ունի մեր իրականության մեջ: «Բռնության պատմությունը մարդկության պատմությունն է, և շատ տարածված տեսակետ կա, որ 150 տարեկանից շուտ մահանալը հենց բռնության արդյունք է, այսինքն՝ բռնությունը սոցիալ մշակութային երևույթ է, որի հիմքում ընկած է այն, որ բռնություն իրագործողի համար բռնությունը միակ վարքային մոդելն է, դա նրա ինքնադրսևորումը և ինքնահաստատումն է: Բռնության արմատները գալիս են դեռ վաղ մանկությունից, բռնություն իրագործողը շատ հաճախ ունենում է մանկական բարդույթներ, որի արդյունքում նրա մոտ ձևավորվում է թշնամական վերաբերմունք շրջապատող աշխարհի նկատմամբ»,- ասաց հոգեբանը:
Բռնությունը ունի տարատեսակներ` ընտանեկան բռնություն, ֆիզիկական բռնություն, հոգեբանական, սեռական բռնություն: Այսօր շատ տարածված են 4 տեսակներն էլ` իրենց դրսևորումներով: Անձի կյանքի համար բավականին վտանգավոր են ֆիզիկական և սեռական բռնությունները, որոնք հանդիպում են առանձին-առանձին, կամ երկուսը միասին: «Ֆիզիկական բռնությունը սկսվում է ծեծով և ավարտվում ընդհուպ մինչև սպանություն: Սեռական բռնության զոհեր հիմնականում դառնում են ավելի խոցելի օղակները` կանայք և անչափահաս երեխաները»:
Սոցիոլոգ Գոհար Շահնազարյանը նշեց, որ բռնությունը սոցիալական երևույթ է և իրենց կենտրոնը հիմանականում աշխատում է այդ ուղղությամբ, նաև փոխելու այն կարծրատիպը, որ բռնությունը ֆիզիոլոգիական հիմքեր ունի, որ բռնանարը ավելի քիչ կրթված, թմրանյութեր և ալկոհոլ օգտագործող անձն է. ոչ միայն Հայաստանում, այլև ողջ աշխարհում սա համարվում է բռնության վերաբերյալ միֆ: Բռնությունը ավելի շատ կապված է իշխանության հնարավորության և իշխանության կիրառման հետ: Երբ կան ռեսուրսներ` կիրառելու բռնությունը, շատ հավանական է, որ մարդը կկիրառի բռնություն:
«Շատ տարբեր կանայք կարող են բռնության զոհ դառնալ, չկա որևէ կոնկրետ խմբավորում. կարող են լինել կանայք, որոնք ունեն բարձրագույն կրթություն, ապրում են իդեալական տնտեսական պայմաններում, բայց միևնույն է, ենթարկվում են բռնության»,- իր խոսքում նշեց սեռական բռնության դեմ պայքարի ծրագրի համակարգող Տաթևիկ Աղաբեկյանը:
