ԿԳՄՍ-ն հրապարակել է պետական և ոչ պետական բարձրագույն ուսումնական հաստատությունների ընդունելության սկզբունքները: Դիմորդները ընդունելության քննության առցանց հայտը՝ մասնագիտական նշումով, կարող են ուղարկել մինչև հուլիսի 15-ը:
Թեմայի շուրջ «Առաջին լրատվական»-ը զրուցել է Երևանի թատրոնի և կինոյի պետական ինստիտուտի ռեկտոր Լիլիթ Արզումանյանի հետ: Ռեկտորը ներկայացրեց իր պարզաբանումներն այն մասին, թե ինչպես կընթանան քննությունները Երևանի թատրոնի և կինոյի պետական ինստիտուտում. «Մեր ինստիտուտում դիմորդները կհանձնեն մեկ մասնագիտական քննություն, որը կներառի երեք բաղադրիչ: Ստեղծել ենք նոր ծարգիր՝ վերցնելով մեկ մասնագիտական առարկա՝ հավելելով 2 բաղադրիչ մյուս առարկաների քննություններից, որպեսզի ամբողջական պատկերացում կազմենք: Ուսանողների համար բեռը մի քիչ թեթևացել է, բայց ստուգման չափորոշիչները չեն փոխվել. առաջնորդվելու ենք 20 բալային համակարգով»:
ԵԹԿՊԻ ռեկտորը նաև տեղեկացրեց, որ բուհի պաշտոնական կայքէջում տեղադրվելու են նոր ծրագրերը: Լիլիթ Արզումանյանի խոսքով՝ նախորդ տարի նվազագույն շեմը հաղթահարած բոլոր դիմորդները ընդունվել են բուհ, և հնարավոր է այս տարի էլ պատկերը նույնը լինի: Նա նաև վստահեցրեց, որ ուսանողներին այս տարի էլ հնարավոր կլինի օբյեկտիվ գնահատել:
Լիլիթ Արզումանյանն իր դիտարկումները ներկայացրեց նաև կառավարության 14-րդ միջոցառման վերաբերյալ, որով նախատեսվում է ուսանողներին աջակցություն հայտնել՝ ելնելով ուսանողների առաջադիմությունից. «Ես կառավարության փոխարեն այլ լուծում կգտնեի՝ բոլորին հավասարապես աջակցություն ցուցաբերելու մոտեցում կցուցաբերեի՝ օրինակ՝ ուսման վարձի 15-20 տոկոսի չափով»:
Մեր զրուցակիցը նաև ընդգծեց, որ մեր ժողովուրդն այդպես էլ միասնական չդարձավ. «Հեղափոխությունից հեղափոխություն հրճվում ենք… Այս հեղափոխությունն էլ հրճվանք էր, համազգային տոն, բայց հետո ի՞նչ ենք անում. էլի սկսել ենք իրար քրքրել… Մենք պետական մտածողություն չունենք, երկիրը երկիր կդառնա յուրաքանչյուր մարդու անհատական պետական մտածողության արդյունքում»:
Մանրամասն՝ տեսանյութում: