«Էյ-Ի-ՋԻ Սերվիս» ընկերությունը համաձայն չէ Քննչական կոմիտեի իրականացրած քննության հետ՝ Ալավերդի քաղաքում շմոլ գազի պատճառով ընտանիքի չորս անդամների մահվան դեպքի առթիվ հարուցված քրեական գործով, որի շրջանակներում մեղադրանք է առաջադրվել ընկերության աշխատակցին։ «Այդ մեղադրանքը դեռ պետք է հաստատվի դատարանում»,- «Առաջին լրատվական»-ի հետ զրույցում ասաց ընկերության տնօրեն Արման Նալբանդյանը։
Հիշեցնենք, որ նախօրեին Քննչական կոմիտեն տեղեկացրեց, որ Լոռու մարզային քննչական վարչության Թումանյանի քննչական բաժնում ավարտվել է Ալավերդի քաղաքում շմոլ գազի պատճառով ընտանիքի չորս անդամների մահվան դեպքի առթիվ հարուցված քրեական գործի նախաքննությունը: Կոմիտեի տեղեկատվության և հասարակայնության հետ կապերի բաժնի հաղորդմամբ՝ մինչդատական վարույթում իրականացված քննչական և այլ դատավարական գործողությունների արդյունքում պարզվել են դեպքի մի շարք հանգամանքներ, ընտանիքի չորս անդամների մահվան պատճառը: Նախաքննության ընթացքում նշանակված դատաճարտարագիտատեխնիկական փորձաքննության եզրակացության համաձայն՝ մահվան պատճառ է հանդիսացել բնակարանում տեղադրված գազի ջեռուցման վառարանի սխալ տեղադրման և անվտանգության սահմանված նորմերի խախտումների արդյունքում բնակարան արտանետված շմոլ գազից թունավորումը: Քննությամբ, մասնավորապես, պարզվել է, որ «Էյ-Ի-ՋԻ Սերվիս» ՍՊ ընկերության Լոռու ԳՀՏՍ ծառայության Ալավերդու տեղամասի փականագործը, պատասխանատու լինելով հիշյալ ընկերության պաշտոնական հրահանգով սահմանված իր աշխատանքային պարտականությունների և դրանց ոչ պատշաճ կատարման համար, իր կողմից սպասարկվող Ալավերդի քաղաքի Սանահին Սարահարթ թաղամասի 2/2-րդ շենքի 38-րդ հասցեում իրականացրել է գազասպառման համակարգերի ոչ պատշաճ և սպառողների կյանքի ու առողջության անվտանգության պահանջներին չհամապատասխանող ներտնային տեխնիկական սպասարկման ծառայություն:
Այդ ընթացքում խախտելով «Գազպրոմ Արմենիա» ՓԲ ընկերության Լոռու ԳԳՄ-ի և բաժանորդի միջև վերակնքված «Բնական գազի մատակարարման» պայմանագրի պահանջները, ամբողջ ծավալով սպասարկում չիրականացնելու պատճառով չի հայտնաբերել գազի ջեռուցման վառարանի անվտանգ շահագործման համար շինարարական նորմերի պահանջներով նախատեսված առկա խախտումները տվյալ բնակարանում, չի կազմել համապատասխան ակտ ու չի արգելել հիշյալ խախտումով գազասպառման սարքավորման շահագործումը:
Արդյունքում՝ 2019 թվականի դեկտեմբերի 23-24-ն ընկած ժամանակահատվածում, գազասպառման սարքավորման շահագործման ժամանակ վառարանի ծխահեռացման անցուղու բացակայության, ծխագազերի քարշի արհեստական սահմանափակման պայմաններում այրման արգասիքները դուրս չեն մղվել մթնոլորտ, ամբողջությամբ լցվել են հյուրասենյակ, որի արդյունքում առաջացել է մարդու առողջության համար վտանգավոր քանակի ածխածնի մոնօքսիդի՝ շմոլ գազի թույլատրելի սահմանաքանակը գերազանցող կոնցենտրացիայի կուտակում հյուրասենյակում և հարակից տարածքներում, որի հետևանքով տեղի է ունեցել ընտանիքի չորս անդամների թունավորում, ինչն անզգուշությամբ առաջացրել է վերջիններիս մահը: Ձեռք բերված բավարար ապացույցների հիման վրա՝ տեղամասի փականագործին մեղադրանք է առաջադրվել՝ ՀՀ Քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը) 3-րդ մասով: Նրա նկատմամբ որպես խափանման միջոց ընտրվել է ստորագրություն չհեռանալու մասին:
«Մեղադրանք առաջադրելը դեռ չի նշանակում, որ մեր աշխատակցի մեղավորությունը եղել է։ Ինչպես հիշում ենք, սպասարկումը տեղի էր ունեցել 2019 թվականի 7-րդ ամսին, երբ դեռ այդ բնակարանում ջեռուցման վառարան տեղադրված չէր եղել։ Աշխատակցի կողմից համապատասխան արձանագրություն էր կազմվել, և խցափակվել էր այդ կետը, որպեսզի բնակիչները ինքնակամ գազասարք չտեղադրեն։ Դրանից հետո բաժանորդները վերանորոգում են կատարել, ինքնակամ պլոմբը պոկել են, վառարանը տեղադրել են, ծխատարը դուրս չեն հանել արտաքին պատից դուրս, որը բարձրանար վերև։ Նրանք պարզապես ծխատարը դեմ են տվել իրենց բնակարանի պատին ու պատի վրա ուղղակի երեք հատ դռելի փոքր անցքեր են կատարել։ Այդքանից հետո վառել են վառարանը, որից հետո եղել է շմոլ գազի արտահոսք դեպի բնակարան և թունավորում։ Հետևաբար՝ այդ մեղադրանքը, որ դատարանում առաջադրվել է, դա դեռ պետք է պարզվի ու ապացուցվի»,-ասաց «Էյ-Ի-ՋԻ Սերվիս» ՍՊԸ-ի տնօրենը։
Վերջինս նշեց, որ, բացի իրենց այդ աշխատակցի հետ զրուցելուց, որին մեղադրանք է առաջադրվել, նաև մահացած ընտանիքի բարեկամներից մեկն է ցուցմունք տվել և ասել, որ այդ բնակարանի վերանորոգումը նոր էր կատարվել, և պարզ երևում է, որ ծխատարը նոր է տեղադրված եղել։
«Այդ ծխատարը, որ րոպեին էլ դնեին, 15 րոպե հետո թունավորվելու էին, և մահացու ելք էր լինելու։ Հնարավոր չէր, որ 10 օր օգտագործեին այդ վառարանը, իսկ 11-րդ օրը դնեին։ Դեպքը եղել է տեղադրման, կամ հաջորդ օրը»,- ասաց տնօրենը՝ հավելելով, որ յուրաքանչյուր դեպքից, թունավորումից հետո ընկերությունում քննարկում է գնում, մեղավորություն է որոշվում, թե ով է եղել դրա մեղավորը, վերահսկողությունն է ուժեղացվում նման դեպքերի կրկնությունը բացառելու համար։
Նշենք, որ այդ ողբերգությունից հետո հարցը հասավ ընդհուպ Ազգային ժողով, հնչեցին ելույթներ, հարցեր բարձրացվեցին «Էյ-Ի-ՋԻ Սերվիս» ՍՊԸ-ի արդյունավետության հետ կապված, և պնդումներ եղան, որ այդ ծառայությունը պետք է պատվիրակվի Արտակարգ իրավիճակների նախարարությանը։ Հիշեցնենք, որ նախկինում գազասպասարկում իրականացնում էր «Հայռուսգազարդը», որը հետագայում այդ ծառայության իրականացումը պատվիրեց «Էյ-Ի-Ջի Սերվիս»-ին:
Արման Նալբանդյանը այսօր մեզ հետ զրույցում ասաց, որ այդ քննարկումների հանգուցալուծումից տեղյակ չէ։ Իրենց հետ որևէ քննարկում այդ թեմայով չի եղել։