Այսօր վերսկսվեց Ռոբերտ Քոչարյանի գործի դատավարությունը, և նրա պաշտպանական խումբը ներկայացնելու է Հայաստանի ու Արցախի նախկին վարչապետների երաշխավորությունը երկրորդ նախագահի խափանման միջոցը փոխելու հարցում: Մինչ այդ, նախօրեին հայտնի դարձավ, որ նախկին այդ վարչապետներից մեկը՝ Կարեն Կարապետյանը հրավիրվել է Ապրիլյան պատերազմի խորհրդարանական քննիչ հանձնաժողով: Դրան զուգահեռ, Հատուկ քննչական ծառայությունը ԱԱԾ նախկին պետ Արթուր Վանեցյանին հայտնել է Վատիկանում ՀՀ նախկին դեսպան Միքայել Մինասյանի հայտարարության հիման վրա նյութեր նախապատրաստելու մասին: Այդ տեղեկությունը հայտնելու համար Արթուր Վանեցյանին հրավիրել էին ՀՔԾ: Ինչպես հայտնի է, Միքայել Մինասյանը հայտարարեց, որ Արթուր Վանեցյանը դեռևս պաշտոնավարած շրջանում, որպես վարչապետ Փաշինյանի սուրհանդակ, Հռոմում հանդիպել է իրեն, առաջարկել է որոշակի փող վճարել որևէ հայաստանյան հիմնադրամի, Հայաստանում չզբաղվել քաղաքականությամբ, առժամանակ չգալ Հայաստան և այդ ամենի դիմաց ունենալ քրեական հետապնդումից ազատ լինելու երաշխիք:
Մինասյանը հայտարարել էր, թե մերժել է այդ առաջարկը: Ակնառու է, որ առաջարկը կարող է լուրջ խնդիր ունենալ օրենքի հետ, այդ թվում՝ ոչ միայն հեղինակի համար՝ եթե ենթադրենք, որ առաջարկն արել է Փաշինյանը, այլ նաև այդ առաջարկը Մինասյանին փոխանցողի, տվյալ դեպքում Արթուր Վանեցյանի համար, եթե նա արել է այդ գործողությունը:
Առայժմ թե՛ Վանեցյանը, թե՛ Նիկոլ Փաշինյանը որևէ կերպ չեն անդրադարձել Մինասյանի հայտարարությանը: Միաժամանակ, Արթուր Վանեցյանը, մի քանի ամիս առաջ մի քանի թերթի խմբագրի հետ հանդիպմանը ազդարարելով իր քաղաքական հավակնությունը, նշել էր նաև Միքայել Մինասյանի հետ հանդիպման մասին՝ ասելով, որ բովանդակությունից տեղյակ է երեք մարդ: Ստացվում է, որ տեղյակ են ինքը, Մինասյանն ու Փաշինյանը: Այդ դեպքում ո՞վ ունի որևէ ապացույց, թե որն է իրական բովանդակությունը: Կարող է ստացվել իրավիճակ, երբ կա երեք մարդ, և կա երեք տարբեր բովանդակություն: Ակնառու է, որ իրավապահների վիճակն այստեղ կլինի շատ բարդ: Մյուս կողմից, սակայն, կա խնդրի քաղաքական բաղադրիչը, որը զարգանալու է իրավականից անկախ: Իսկ այստեղ փաստացի ստացվում է դարձյալ խրթին մի վիճակ, որը վկայում է, որ տվյալ պարագայում էական է լինելու գործընթացը, որի համար Մինասյանի պատմությամբ պայմանավորված բովանդակությունն ավելի շուտ, թերևս, շեղող մանևր է կամ կեղև, իսկ գործընթացի կորիզը բոլորովին այլ բնույթի է և, այսպես ասած, տնկվում է ոչ արագ, եթե ոչ երկարաժամկետ, ապա առնվազն միջնաժամկետ ժամանակի մեջ ծիլ տալու ակնկալիքով:
Բանն այն է, որ նախկին դեսպանն այդպիսով հրահրում է մի գործընթաց, որը, եթե ոչ ստվերում է թողնում Ռոբերտ Քոչարյանի գործը, ապա առնվազն զգալիորեն խլացնում է այն: Բանն այն է, որ մինչ այժմ, կարծես թե, Ռոբերտ Քոչարյանինն էր նոր իշխանության հետ ամենամեծ կոնֆլիկտը: Այդ առումով, Մինասյանը փաստորեն մարտահրավեր է նետում ոչ այնքան Փաշինյանին՝ թեև, իհարկե, նաև նրան, սակայն գործնական ազդեցության իմաստով, ավելի շուտ Ռոբերտ Քոչարյանին, որովհետև ո՞ր իշխանության հետ կոնֆլիկտի մեծությամբ է ըստ էության որոշվելու նախկին իշխող համակարգի «հսկիչ փաթեթի» տնօրինությունը: Իսկ այդտեղ արդեն հարցերը ստանում են ավելի բազմազան և բազմավեկտոր բնույթ՝ կապված ոչ միայն նոր իշխանության, այլև միմյանց միջև հարցերի ու պատասխանների հետ:
Լուսանկարը՝ Armeniasputnik-ի
