ԱՄՆ Պետդեպարտամենտը հաստատել է, որ, այսպես կոչված, «Վագների ՄՌԸ»-ի զինյալներն իսկապես մարտնչում են Լիբիայում՝ գեներալ Խալիֆա Հաֆթարի կողմում, ընդդեմ Տրիպոլիի միջազգայնորեն ճանաչված կառավարության, բայց չի հաջողվել ճշտել, թե ՄՌԸ-ի հատկապես քանի աշխատակից կա այնտեղ:
Նախօրեին հրապարակված ՄԱԿ-ի դիտորդական առաքելության զեկույցում պնդվում է, որ առնվազն 1200 ռուս վարձկաններ են գտնվում Լիբիայում: ԱՄՆ պետքարտուղարի օգնականի տեղակալ Քրիստոֆեր Ռոբինսոնի խոսքով, այս երկրում նրանց թիվն անընդհատ փոխվում է: Միևնույն ժամանակ, դիվանագետը շեշտել է, որ Վաշինգտոնը ստորաբաժանումը «մասնավոր ռազմական ընկերություն» չի համարում:
«Նրանք ունեն ծանր ժամանակակից զենքեր և ամենաժամանակակից տեխնիկա, որոնք չունեն մասնավոր ընկերությունները: Այս ամենը ցույց է տալիս, որ «Վագների» գործունեությունը ղեկավարվում է Ռուսաստանի կառավարության կողմից»,- ասել է նա Պետդեպարտամենտում կայացած հեռախոսային ճեպազրույցի ժամանակ: