Մոտ 200 հայտնի մշակութային գործիչներ, գիտնականներ և մարզիկներ բաց նամակ են ստորագրել, որում կոչ են անում առաջնորդներին և քաղաքացիներին փոխել իրենց կենսակերպը՝ էկոլոգիական աղետը կանխելու նպատակով: Նամակը հրապարակել է ֆրանսիական Le Monde պարբերականը, փոխանցում է ՏԱՍՍ-ը:
Փաստաթղթում նշվում է, որ կորոնավիրուսի համաճարակը մարդկանց ստիպել է գիտակցել մարդկության գոյությանը սպառնացող վտանգը, ուստի «սովորությունների պարզ ճշգրտումը բավարար չի լինի»:
Հեղինակները կոչ են անում մարդկությանը «հրաժարվել չհիմնավորված տրամաբանությունից և աշխատել տնտեսական զարգացման նպատակների, արժեքների ու սկզբունքների փոփոխման ուղղությամբ», քանի որ սպառողական փիլիսոփայությունը մարդկանց հասցրել է «ինքնին կյանքի ժխտմանը»:
«Արմատական վերափոխում է անհրաժեշտ բոլոր մակարդակներում, ինչը խիզախություն և քաջություն է պահանջում»,- շեշտել են նամակի հեղինակները:
Նամակը ստորագրել են Ռոբերտ Դե Նիրոն, Ջուլիետ Բինոշը, Միխայիլ Բարիշնիկովը, Պենելոպե Կրուզը, Բարբարա Սթրեյզանդը, Մոնիկա Բելուչին, Սթինգը, Մադոննան, քիմիայի, ֆիզիկայի և բժշկության ոլորտներում Նոբելյան դափնեկիրները, ինչպես նաև բազմաթիվ այլ հայտնի դերասաններ, երաժիշտներ, գիտնականներ և մարզիկներ: