Համավարակի պատճառով Ռուսաստանի Պրեմիեր լիգան չի վերսկսվի, գրում է «Սպորտ-Էքսպրես» պարբերականը, նշելով որ այս մասին պաշտոնապես կհայտարարվի մայիսի 15-ին։ Նույն աղբյուրի համաձայն հաշվի են առնվելու դադարեցման պահին գրանցված արդյունքները և մրցաշարային աղյուսակում տիրող պատկերը։ Խաղացված 22-րդ տուրից հետո 50 միավորով առաջին հորիզոնականում է Սանկտ Պետերբուրգի «Զենիթը»։ Երկրորդ հորիզոնականում 41 միավորով Մոսկվայի «Լոկոմոտիվն» է, իսկ մոսկովյան մեկ այլ ակումբ ԲԿՄԱ-ն նույնքան միավորով եզրափակում է լավագույն եռյակը։ Այսպիսիով մեկ շաբաթ անց պաշտոնապես կհայտարարվի «Զենիթի» Ռուսաստանի չեմպիոն դառնալու մասին։ Առաջնությունն անավարտ թողնելու մասին որոշումը իրարանցում և բողոքի լայն ալիք է բարձրացրել մյուս թիմերի շրջանում։ Խոսքը վերաբերվում է այն ակումբներին, որոնք գտնվում են մրցաշարային աղյուսակի ստորին հատվածում։
Մասնավորապես այս պահին մրցաշարային աղյուսակը եզրափակում է Գրոզնիի «Ախմատը», որը պատկանում է Չեչնիայի նախագահ Ռամզան Կադիրովին։ Վերջինս զբաղեցնում է նաև ակումբի պատվավոր նախագահի պաշտոնը։ Եվ ահա կանոնադրության համար վերջին երկու հորիզոնականները զբաղեցրած ակումբները պետք է հրաժեշտ տային բարձրագույն լիգային և հաջորդ մրցաշրջանում հանդես գային առաջին դիվիզիոնում։ Ռուսաստանի ֆուտբոլի միությունը, սակայն վերջին պահին փոփոխել է կանոնադրությունը, որի համաձայն մրցաշարային աղյուսակը եզրափակած երկու ակումբները չեն լքի Պրեմիեր լիգան։ Գալիք մրցաշրջանում Ռուսաստանի բարձրագույն լիգայում 16-ի փոխարեն կխաղան 18 թիմեր։ Ռուսաստանում արդեն իսկ խոսվում է այն մասին, որ Պրեմիեր լիգայի վերաբերյալ կայացվել է քաղաքական որոշումը։ Մասնավորապես, Կադիրովին չնեղացնելու համար երկրի իշխանությունները ՌՖՄ-ին հրահանգել են առաջին լիգա չուղարկել «Ախմատին» և ավելացնել առաջնության թիմերի քանակը։ Գրոզնի թիմին գալիք մրցաշրջանում Պրեմիեր լիգայում խաղալուց զրկելու պարագայում՝ Չեչնիայում բողոքի լայն ալիք կբարձրանար։ Այսօր էլ Գրոզնիում վրդովված են, որ իրենց սիրելի թիմը առաջնությունը ավարտելու է վերջին տեղում։ Նշենք, որ «Զենիթ» ֆուտբոլային ակումբն էլ ըստ էության պատկանում է «Գազպրոմ» ընկերությանը։ Սանկտ Պետերբուրգի թիմին չեմպիոն հռչակելու որոշումը զայրույթ է առաջացրել հատկապես մոսկովյան թիմերի երկրպագուների շրջանում։
Նրանք ևս հնարավոր որոշման քաղաքական երանգներ են տեսնում։ Մոսկովյան թիմերի երկրպագուները շարունակ օրինակ են բերում Բելառուսը, որտեղ համավարակի պայմաններում առաջնությունն ընթանում է բնականոն հունով։ Այսպիսով Ռուսաստանը կդառնա եվրոպական 4-րդ երկիրը որտեղ ընդհատված առաջնությունը չի ավարտվի։ Ավելի վաղ նման որոշում էին կայացրել Բելգիան, Հոլանդիան և Ֆրանսիան։ Բելգիայում չեմպիոն էր հռչակվել «Բրյուգեն», իսկ Ֆրանսիայում ՊՍԺ-ը։ Ի դեպ, ի տարբերություն մյուս 3 երկրների՝ Հոլանդիայի 2019/20 թվականի մրցաշրջանը հաղթող չի ունենա: Բարձրագույն խմբից ոչ մի ակումբ դուրս չի մնա, իսկ եվրագավաթներին ակումբները կմասնակցեն առաջնությունում մինչև դադարը զբաղեցրած տեղերը հաշվի առնելով: Հոլանդիայի առաջնությունը դադարեցվել էր 25-րդ տուրում: Առաջատարը «Այաքսն» էր, երկրորդ տեղում՝ ԱԶ-ն, իսկ եռյակը եզրափակում էր «Ֆեյենորդը»: Այս որոշումը մեծ աղմուկ էր բարձրացրել թե Հոլանդիայում և թե եվրոպական ֆուտբոլում։
Նիդեռլանդների կառավարության որոշման համաձայն մինչև այս տարվա սեպտեմբերի 1-ը արգելվել են բոլոր զանգվածային միջոցառումները, այդ թվում՝ նաև սպորտային մրցաշարերը։ Ավելի վաղ ՈՒԵՖԱ-ն իր անդամ երկրների համար վերջնաժամկետ է սահմանել ազգային առաջնություններն ավարտելու համար։ Մասնավորապես, մինչև հուլիսի 31-ը եվրոպական կառույցի անդամ երկրները պետք է ավարտին հասցնեն ներքին առաջնությունները։ Ավելին, օգոստոսին Չեմպիոնների և Եվրոպա լիգայի 2019/2020 թթ. խաղարկությունն ավարտին հասցնելուց հետո ՈՒԵՖԱ-ն մտադիր է նույն ամսին կազմակերպել արդեն 2020/2021 թթ. Չեմպիոնների լիգայի ու Եվրոպա լիգայի որակավորման փուլերը։ ՈՒԵՖԱ-ն և ՖԻՖԱ-ն ամեն գնով փորձում են փրկել ֆուտբոլը փոշիացումից, բայց… 4 երկրների օրինակը խոսում է այն մասին, որ միայն ֆուտբոլային կառույցների ջանքերը բավարար չեն։ Կա նաև քաղաքական գործոնը, որն ըստ էության առանցքային է։ Մասնավորապես, հաշվի առնելով համավարակի հետևանքով ստեղծված իրավիճակը պետությունների իշխանություններն ուղղակի չեն ցանկանում ռիսկի դիմել։ Առաջնություններն անավարտ թողնելու որոշումն արդեն իսկ ծանր հարված էր եվրոպական ֆուտբոլին։
Հավանականությունը մեծ է, որ առաջիկայում նման որոշումներ կկայացնեն մյուս երկրները։ Այս դեպքում, ըստ մոտավոր հաշվարկի, ֆուտբոլային ակումբների մոտ 30 տոկոսն ուղղակի կլուծարվի։