Ֆինանսների նախարարությունը հայտնում է, որ նախարարի որոշմամբ կարճվել է Շանգրի Լա խաղատան առնչությամբ հարուցված վարույթը, որը կարող էր դառնալ խաղատունը լիցենզիայից զրկելու պատճառ: Այդ հարցը ուշադրության արժանի էր այն համատեքստում, որ խաղատունը պատկանում է Գագիկ Ծառուկյանին՝ Հայաստանի խորհրդարանի երկրորդ ուժի ղեկավարին: Միաժամանակ, այդ հարցի օրակարգում հայտնվելը հատկապես հետաքրքիր էր նաև Ծառուկյանին պատկանող կոնցեռնի՝ Մուլտի գրուպի գործադիր տնօրեն Սեդրակ Առուստամյանի կալանավորման ֆոնին, որին մեղադրում են ՊԵԿ նախկին նախագահ Գագիկ Խաչատրյանին 22 միլիոն դոլարի կաշառք տալու համար: Եթե դրան գումարենք նաև այն, որ խնդիրներ են առաջացել Ծառուկյանին պատկանող մեկ այլ օբյեկտում՝ «Արարատցեմենտ»-ում, որտեղ ծագել է մի քանի աշխատողի հետ պայմանագիրը չշարունակելու պատմություն և նրանք պնդում են, որ դա ունի քաղաքական պատճառ, ապա նկատելի է դառնում Ծառուկյանի «բիզնես կայսրության» շուրջ ստեղծված բավականին լարված վիճակը:
Միևնույն ժամանակ, ԲՀԿ ղեկավարը ընդգծված կերպով ձեռնպահ է մնացել այդ հարցերը քաղաքական տիրույթում դիտարկելուց: Ավելին, ներկայումս իշխանության հանդեպ նախկին համակարգից և ոչ միայն այդ ուղղությունից տեղեկատվա-քարոզչական ուժգին գրոհի պայմաններում ԲՀԿ-ն չափազանց զուսպ է, ինչը դրսևորվում է նաև խորհրդարանում: «Բագավաճ Հայաստան»-ի քաղաքական շահն այստեղ հասկանալի է, խնդիրը լոկ այն չէ, որ Ծառուկյանը կարող է մտավախություն ունենալ բիզնեսից զրկվելու հարցում: Նրա համար թերևս ավելի մտահոգիչ կլինի քաղաքական կորուստը, որ կունենա իշխանության դեմ նախկին համակարգի ուժգին գրոհի ալիքին կամա, թե ակամա միանալուց: Արդյո՞ք քաղաքական մեծամասնությունն էլ դիտարկելով այդ պահը ուժգնացրել էր ճնշումը Ծառուկյանի վրա, թույլ չտալով, որ նա իրեն հարմարավետ զգա, երբ այսպես ասած կռվում են հին ու նոր իշխանությունները:
Մյուս կողմից պետք չէ բացառել, որ Ծառուկյանին կարող էին արված լինել իշխանության դեմ «երկրորդ ճակատ» բացելու առաջարկներ և կառավարության գործողությունը ունեցել է դա կանխելու նպատակ և այն, որ ֆինանսների նախարարությունը փաստորեն մի քայլով թուլացնում է ԲՀԿ ղեկավարի բիզնեսների շուրջ «կարանտինը», հուշում է, որ Ծառուկյանը մերժել է «երկրորդ ճակատի» առաջարկները: