ՀՀ վարչապետ Նիկոլ Փաշինյանը Ազգային ժողովում այսօր ներկայացրել է 2018-2019թթ Կառավարության ծրագրի կատարման ընթացքը: Սա կլիներ սովորական խորհրդատվություն խորհրդարանին, եթե չլիներ կորոնավիրուսի հանգամանքը և այդ ֆոնին տեղի ունեցող իրադարձությունները, որոնց շուրջ էլ, ըստ էության, ծավալվեցին վարչապետ-պատգամավորներ հարցուպատասխանները:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, «Իրազեկ քաղաքացիների միավորում» ՀԿ համակարգող Դանիել Իոաննիսյանը և զարգացման ու կառավարման խորհրդատու Կարեն Սարգսյանը:
Հարցերի գերակշիռ մասը վերաբերում էին իրավապահ համակարգին: Հակոբ Բադալյանի խոսքով՝ խնդիրները միայն իրավապահ համակարգում չեն, շատ խնդիրներ կան. «Հատկապես ճգնաժամային իրավիճակում հնարավոր չէ, որ խնդիրներ չլինեն, և կան հասարակական-քաղաքական կառույցներ, որոնք իշխանությանը մատնացույց են անում այդ խնդիրները: Իրավապահ համակարգը ուշադրության կենտրոնում էր հայտնվել, որի պատճառը, կարծում եմ, նախօրեին Արգիշտի Քյարամյանի նշանակումն էր ԱԱԾ պետի տեղակալի պաշտոնում, առավել ևս երբ վարչապետն էլ հայտարարեց, որ քաղաքական որոշում է կայացվել: Այդ նշանակումը հրատապ անհրաժեշտության տպավորություն է թողնում, և միևնույն ժամանակ վարչապետը կարծես թե իր անձնական ներկայությունն է ուզում ուժեղացնել ԱԱԾ-ում՝ նշանակելով իր համար վստահելի մարդու: Այս քայլը անվստահությո՞ւն էր ԱԱԾ պետի և ընդհանրապես ԱԱԾ վերնախավում տիրող իրավիճակի հանդեպ, դժվար է ասել, համենայնդեպս այս նշանակումը հատկանշական կադրային քայլ էր… Իհարկե իրավապահ ուժային բլոկում խնդիրներ կան և այդ բլոկի գործունեությունը հեղափոխությունից հետո պարբերաբար հարցեր է առաջացնում»:
Դանիել Իոաննիսյանի դիտարկմամբ՝ իրավապահ համակարգում, մասնավորապես ոստիկանությունում և հատկապես ԱԱԾ-ում լուրջ խնդիրներ կան: «ԱԱԾ-ն ունի երկու լրջագույն խնդիր. առաջին՝ ԱԱԾ-ն չի բավարարում ժողովրդավարական երկրում անվտանգության մարմնին ներկայացվող պահանջներին, և երկրորդ խնդիրը կապված է գործունեության արդյունավետության հետ… ԱԱԾ-ում շատերը ժողովրդավարական արժեքների կրողը չեն և հեղափոխական չեն»:
Կարեն Սարգսյանն ընդգծեց, որ անհրաժեշտ է փոփոխել ԱԱԾ կառավարման մոդելը:
Մանրամասն՝ տեսանյութում: