Լուրեր
Մենք տգետ ենք, ոտի տակ ընկնելու սովորություն ունենք․ Էդգար Բաղդասարյան

Տարիներ շարունակ կուտակված խնդիրներն այս ֆորսմաժորային իրավիճակում հնարավոր է պայթեն: Որքանո՞վ լուրջ ճգնաժամի առջև կկանգնենք: Թեմայի շուրջ «Առաջին լրատվական»-ի հետ զրույցում ռեժիսոր, պրոդյուսեր Էդգար Բաղդասարյանը նշեց. «Տպավորություն է, որ ճգնաժամից դուրս չենք գալիս արդեն 30 տարի, մի ճգնաժամը փոխարինվում է մյուսով, և հիմնական ճգնաժամը տնտեսականը չէ, տնտեսական ճգնաժամից հնարավոր չէ զերծ մնալ, բայց խնդիրն այն է, թե մենք՝ հայերս, ինչպես դուրս կգանք այս ամենից, ինչ կորուստներով ու ինչ նվաճումներով և ինչպիսի մարդկային տեսակով. այս հարցն է ինձ մտահոգում»:

Անդրադառնալով դիտարկմանը, որ հայ հասարակությունը սովոր է ապրել փակ սահմանների պայմաններում, և ավագ սերունդը, դժվարությունների միջով անցնելով, թերևս, ինչ-որ չափով յուրօրինակ իմունիտետ է ձեռք բերել, Էդգար Բաղդասարյանը նշեց, որ դիմակայել և զրկանքները հոգեբանորեն հնարավոր է հանգիստ տանել, երբ որ լույս է երևում թունելի վերջում, այսինքն՝ հույս կա:

«Սովի դեմ հնարավոր չէ իմունիտետ ունենալ… Այսօր մենք ավելի կուշտ ենք և արտաքնապես ավելի մաքուր ու խնամված, բայց ներքուստ ինչ-որ կարևոր բան ենք կորցրել, և այսօր ավելի շատ են ընկճախտի մեջ ընկնում… Մենք պատերազմի մեջ էինք, բայց հավատ ունեինք, որ դուրս ենք գալու այդ վիճակից: Այսօր վեկտորներն անհասկանալի են: Աշխարհում գործընթացներ են գնում, որոնց մեր երկիրը, ինչպես և գլոբուսի մեծ մասը, մասնակից չէ, 5-6 խաղացողներ կան, և մենք ուղղակի պիտի ոտնատակ չընկնենք, որ մեր տեսակը չկորցնենք: Պարզվում է, որ մենք այնքան էլ խելացի չենք, որքան թվում է…»,- նշեց մեր զրուցակիցը:

Ռեժիսորի դիտարկմամբ՝ վերջերս շոկային ապրումներ են առաջացնում ֆեյսբուքյան զարհուրելի անեծքներն ու հայհոյանքները: «Պետք է հասկանանք, որ նման կերպ շարունակել հնարավոր չէ»,- նշեց Էդգար Բաղդասարյանը՝ նաև ընդգծելով, որ յուրաքանչյուր իշխանություն, որ գալիս է, պետք է աշխատի հասարակության բացասական կողմերը վերացնելու ուղղությամբ:

 

Մանրամասն՝ տեսանյութում:

  • Դիտումներ՝ *