Երևանի ընդհանուր իրավասության դատարանում մայիսի 8-ին դատավոր Աննա Դանիբեկյանի նախագահությամբ կկայանա սահմանադրական կարգի ենթադրյալ տապալման գործով դատական նիստը:
Այս մասին տեղեկանում ենք «Դատալեքս» դատական տեղեկատվական համակարգից:
«Ա1+»-ը Ռոբերտ Քոչարյանի փաստաբան Հովհաննես Խուդոյանից հետաքրքրվեց՝ արդյոք նիստը կայանալո՞ւ է նշված օրը․ փաստաբանն ասաց, որ հստակ կանխատեսել չի կարող, բայց վստահեցրեց, որ փաստաբանական խումբը դատարան ներկայանալու է.
«Ծանուցում ստացել ենք, այլ պատճառ չեմ տեսնում չկայանալու»:
Հարցին, թե Քոչարյանը մասնակցելո՞ւ է դատական նիստին, Խուդոյանն արձագանքեց, որ իրենց կողմից որևէ խոչընդոտ չկա, եթե քրեակատարողական հիմնարկը խոչընդոտ չստեղծի, նիստին կներկայանա նաեւ Ռոբերտ Քոչարյանը:
Հետաքրքրվեցինք՝ արդյոք առողջական վիճակը խոչընդոտ չէ՞, որովհետև վերջին օրերին հայտնի դարձավ, որ վերջինս հիվանդանոցում է և պետք է վիրահատության ենթարկվի, Խուդոյանը հաստատեց, որ հիվանդանոցում է և հավելեց, որ դատարան ներկայանալու է հիվանդանոցից:
«Մի քանի այլ գործերով գիտեմ, որ քերակատարողական հիմնարկները կալանավորներին չեն տեղափոխել դատարան կորոնավիրուսով պայմանավորված, բայց չեմ կարծում, որ այս դեպքում այդ խնդիրը կա»:
Մեր ճշտող հարցին, թե այսինքն առողջական վիճակը այնպիսին է, որ կարո՞ղ է մասնակցել դատական նիստին, փաստաբանը դրական պատասխան տվեց:
Ինչ վերաբերում է կորոնավիրուսով պայմանավորված հնարավոր ռիսկերին, եթե Քոչարյանը ներկայանա դատական նիստին, փաստաբանն ասաց՝ վտանգ տեսնում են և հենց դրա մասին են բարձրաձայնում.
«Ռոբերտ Քոչարյանի՝ դատարան ներկայանալու նպատակներից մեկն այն է, որ քննարկվի ազատության հարցը վտանգի նվազեցման համար»:
Հիշեցնեք, որ Ռոբերտ Քոչարյանի պաշտպան Հովհաննես Խուդոյանը նոր միջնորդություն է ներկայացրել Երևան քաղաքի ընդհանուր իրավասության դատարան՝ խնդրելով վերացնել իր պաշտպանյալի նկատմամբ ընտրված խափանման միջոց կալանավորումը: Ինչպես նշված է փաստաբանական խմբի հայտարարության մեջ, միջնորդության համար հիմք է եղել երկրում առկա կորոնավիրուսային հիվանդության համաճարակը և Քոչարյանի վարակման վտանգը՝ հաշվի առնելով, որ նա գտնվում է տարիքային ռիսկային խմբում:
Խուդոյանը նաև դիմել է Երևանի ընդհանուր իրավասության դատարանի նախագահին՝ ներկայացված միջնորդությունն այլ դատավորի վերամակագրելու համար:
