«Սասնա ծռեր» կուսակցության առաջնորդ Ժիրայր Սեֆիլյանն օրերս գրառում է կատարել այն մասին, որ Հայաստանում կառավարումը ճգնաժամի մեջ է, կառավարությունը չի կարողանում տիրապետել իրավիճակին, և իրենք ունեն տեղեկություն, որ Նիկոլ Փաշինյանը պատրաստվում է հանձնել իշխանությունը նախկին համակարգին և կրեմլյան, ԿԳԲ-ական շրջանակներին: Դա կանխելու, թույլ չտալու և ազգային պետություն կառուցելու համար Սեֆիլյանը կոչ է անում համախմբվել բոլոր առողջ ուժերին: Կլինի՞ համախմբում, թե՞ ոչ, կերևա առաջիկա գործընթացներում:
ԳԽ պատգամավոր Ազատ Արշակյանի կարծիքով՝ համախմբվելու մասին հայտարարությունը պետք է լինի հետևյալ կերպ. «Սկզբում լինում է գլխավոր ծրագիրը, նպատակը և այդ նպատակին հասնելու ճանապարհը, ապա գործողությունների հաջորդականությունը։ Հենց որևէ մեկն ասում է՝ համախմբվեք, փաստորեն ասում է՝ իմ շուրջը համախմբվեք, այսինքն՝ եկեք տողան կանգնեք իմ ենթակայության տակ, ես հրամայում եմ։ Հայաստանում հնարավոր չէ հրամանով տողան կանգնեցնել քաղաքական ուժերին, պետական ուժերին։ Շարժվի՛ր, աջից ձախ շարժվի՛ր, ահա այդպիսին է «Սասնա ծռերի» տարածած հաղորդագրության էությունը»։
Ըստ Արշակյանի՝ հայտարարությանը կարձագանքեն նրանք, ովքեր սպասում են՝ որևէ տեղ լինի, գնան տողան կանգնեն. «Նրանք ուզում են որևէ մեկի հաճախորդը լինել, բայց արդյոք «Սասնա ծռերը» կարո՞ղ են հաճախորդ պահել։ Եթե դա լուրջ է, «Սասնա ծռերը» հայտարարում են իրենց ծրագիրը, դրա շուրջը համախմբվում են։ Իրենք էլ՝ արդեն որպես նախաձեռնող խումբ, համախմբողների հետ միասին սկսում են մերժել ոչ ցանկալիներին։ Ես ընդհանրապես համարում եմ՝ այդպես չի կարող լինել։ Միայն մեկ դեպքում է հնարավոր, երբ որևէ ռեգիոնալ կամ ավելի մեծ ուժ ուզում է Հայաստանում կազմակերպել ազդեցության գործակալների խումբ։ Իսկ քանի որ «Սասնա ծռերը» հայտարարում են, որ դա օտարների գործակալության դեմ է՝ ուրիշ բան պետք է անեն։ Իրենց ընտրած տարբերակով սովորաբար իմպերիական ուժերն են աշխատում, մարդկանց են հավաքագրում։
Ես սա հավաքագրման կոչ եմ համարում ու կարծում եմ՝ այն չի կայանա»։
Մեր զրուցակիցը նաև կարծում է, որ տարածված հայտարարության մեջ հակասություն կա. «Այդ ի՞նչ հետախուզական տվյալներով են իրենք իմացել, որ այդպիսի ծրագիր կա։ «Դա, գիտեք, շատ նման է հոմոսեքսուալիզմի դեմ պայքարողներին։ Ասում է՝ ես գիտեմ, որ նա հոմոսեքսուալիստ է, որտեղի՞ց գիտես, ասում է՝ իմ պարտնյորն է։ Հիմա դուք ո՞ւմ պարտնյորն եք, այդ ի՞նչ հետախուզություն է, ի՞նչ հայտնի կամ անհայտ աղբյուրներ են, որոնք ձեզ հույժ գաղտնի տեղեկություններ են տալիս։ Այսինքն՝ մտածում եք, որ հեղափոխությունը հույժ գաղտնի պայմանավորվածություն ունի մեր թշնամիների հետ՝ Հայաստանը հանձնել։ Որտեղի՞ց գիտեք, ո՞վ է ձեզ դա ասում՝ մեր թշնամինե՞րը, թե՞ հեղափոխականներն են իրենց ծրագրերը ձեզ պատմում»,- եզրափակեց նա։
Քաղաքական ուժերից և որևէ մեկն առայժմ պաշտոնապես չի արձագանքել «Սասնա ծռերի» հայտարարությանն ու կոչին։ ԳԽ պատգամավոր Վիգեն Խաչատրյանն էլ «Առաջին լրատվական»-ի հետ զրույցում «Ծռերի» նախաձեռնությունն անլուրջ ու անհավասարակշիռ որակեց։
Լուսանկարը՝ Armeniasputnik-ի