Որոշ բույսերի մզվածքներ կարող են թեթևացնել խումարը, ենթադրում են Մայնցի Յոհան Գուտենբերգի համալսարանի գերմանացի գիտնականները: Այդ մասին հայտնում է MedicalXpress-ը:
Նրանք փորձ են անցկացրել 18-ից 65 տարեկան 214 մարդու հետ, որոնք բաժանվել են երեք խմբի: Խմելուց 45 րոպե առաջ և անմիջապես հետո կամավորներին հատուկ լուծույթ տրվեց խմելու: Առաջին խմբի համար լուծույթը ներառում էր կոճապղպեղի արմատ, բարբադոսյան բալ, տատասկաթուզ, գինկգո երկբլթակ, ուռենու տերև, մագնեզիում, կալիում, նատրիումի բիկարբոնատ, ցինկ, ռիբոֆլավին, տիամին և ֆոլաթթու, ինչպես նաև ստեվիոլ գլիկոզիդներ և ինուլին:
Երկրորդ խմբի լուծույթում բացակայում էր բույսերի մզվածքը, իսկ երրորդ խմբինը պլացեբո էր:
Ուսումնասիրության մասնակիցները չորս ժամ ալկոհոլ խմեցին: Դրանից առաջ և դրանից հետո, ինչպես նաև 12 ժամ անց, նրանցից արյան և մեզի անալիզ են վերցվել, չափվել է արյան ճնշումը: Կամավորների ինքնազգացողության մասին տվյալներ են հավաքվել նաև հաջորդ օրը:
Փորձի արդյունքները ցույց տվեցին, որ խմբերում խումարի ախտանիշների ինտենսիվությունը տարբեր էր: Նրանք, ովքեր բույսերի մզվածքով, վիտամիններով և հանքանյութերով լուծույթ էին ստացել, ամենալավն էին զգում: Պլացեբո ընդունած մասնակիցների համեմատ, առաջին խմբի գլխացավը նվազեց 34% -ով, սրտխառնոցը`42% -ով, անտարբերության զգացումը՝ 27% -ով, անհանգստությունը՝ 41% -ով: Երկրորդ խմբում էական բարելավումներ չեն նկատվել:
Ըստ գիտնականների, պատճառը բույսերում առկա պոլիֆենոլներն ու ֆլավոնոիդներն են: Թե կոնկրետ որ մեխանիզմներն են այդ ազդեցությունն ունեցել մասնակիցների ինքնազգացողության վրա, դեռ պետք է պարզել:
Հետազոտողները նկատել են, որ միայն վիտամիններն ու հանքանյութերը չեն օգնել մարդկանց հաղթահարել խումարը: Սա կասկածի տակ է դնում այն համոզմունքը, որ խումարի պատճառը ջրազրկումն ու էլեկտրոլիտային հավասարակշռության խախտումն են: Բացի դրանից, ստացված տվյալները ցույց են տալիս, որ ալկոհոլը միշտ չէ, որ օրգանիզմում հեղուկի կորստի է հանգեցնում: